Cardi B yavuze impamvu ashaka kugurisha inzu afite i Atlanta

Umuraperikazi Belcalis Marlenis Cephus uzwi nka Cardi B yashyize avuga ko yumva adatekanye iyo ari mu rugo i Atlanta kubera ko uwahoze ari umugabo we, Offset, ariho aba, bityo arashaka kugurisha inzu ahafite, agasubire kuba i New York.

Mu mezi ya nyuma y'umwaka ushize wa 2024, Cardi B uzwi mu ndirimbo Girls Like You, Up na Like What, yatanze impapuro za gatanya ngo atandukane n'umugabo babyaranye abana batatu, Offset.

Ubu arasa n'ubihiwe no kuba hafi y'uyu mugabo, abigaragaza aca ku mbuga nkoranyambaga amenyesha ko ashaka umuguzi w'inzu ye.

Yagize ati:"Inzu yanjye sinyishaka na busa!"

Cardi B yakomeje asobanura ko atanejejwe no kuba i Atlanta aho uwo babyaranye, Offset, atuye. Ntiyakwishimira kumva aba mu gace kamwe n'uwo mugabo. Arashaka kuhava agasubira gutura i New York, abaneyo n'abana be batatu.

Nubwo uyu mugore adashaka kuhaba, imyubakire y'iyo nzu yakuruye abatari bake bifuza kuyegukana. Umwe mu batanze ibitekerezo ku ifoto y'iyo nzu ni umuraperi Rick Ross wahise anyarukira ahatangirwa ibitekerezo abaza igiciro cyayo.