Umutoza wa Arsenal, Mikel Arteta yavuze icyo kwishimira nyuma yo gutsinda Manchester United

Ku mugoroba wo ku wa Gatatu tariki ya 04 Ukuboza 2024, hari umukino wari utegerejwe n’abatari bake wahuje ikipe ya Arsenal na Manchester United warangiye ari ibitego 2-0 utuma umutoza wa Arsenal, Mikel agaruka ku gisobanuro cyo gutsinda kuri uwo munsi.

Ibyo bitego byatsinzwe mu gice cya kabiri; icya mbere cyatsinzwe ku munota wa 54’ na Timber ikindi gitsindwa ku munota wa 73’ na Saliba.

Mu kiganiro n’itangazamakuru cyabaye nyuma y’umukino, Mikel Arteta yikije ku mateka yandikiwe muri sitade yabo bakiniyemo ya Emirates.

Yagize ati:”Ndishimye cyane. Ni ijoro ridasanzwe aho dutsinze mukeba, tunuzuza imikino 500 dukinira muri iyi sitade yacu y’amateka. Uburyo twarangije igice cya mbere nta gitego dufite, ariko twagaruka tugatsinda n’umuzamu wacu, David Raya agakuramo imipira yari kuvamo ibitego, ni umukino wagaragayemo ibintu byiza!”

Mikel yahamije ko ikipe ye igomba gukomeza kubihira andi makipe. Ati:”Ndatekereza ko dushaka gukomeza kuba ikipe nziza itsinda, itera ubwoba andi makipe […] tugatsindira muri buri ruhande. Ibyo twabikozeho kandi twizeye ko bizatanga umusaruro.”

Yabajijwe kubijyanye icyo atekereza ku ikipe ye iri ku mwanya wa 3 ku rutonde rw’agateganyo rwa shampiyona y’Abongereza, ubundi agira ati:”Ntabwo twitaye aho twari turi mu gice cya mbere. Ndatekereza ko dukwiye kwita ku kazi kacu, tukagerageza gutsinda imikino idutegereje.”

“Ikipe yacu iri kwitwara neza ikwiye itsinzi. Mubona ko irwana kugeza ibonye ibitego, turakomeza kwitwara neza.”

Mu mikino ya shampiyona, Arsenal izagaruka mu kibuga ku Cyumweru, tariki ya 08 Ukuboza 2024, aho izakirwa na Fulham kuri ‘Craven Cottage.’

Ku rundi ruhande, umutoza wa Manchester United, Ruben Amorim, uherutse kuva mu ikipe yo muri Portugal, Sporting CP, yavuze ko bagiye gukina babizi ko umukino utaza kuborohera.

Ati:”Twari tubizi ko umukino uza kudukomerera. Ndatekereza ko uburyo burimo koloneri bwagiye buduteza ibibazo butuma badutsinda. Twatsinzwe ariko twagerageje.”

Uko gutsindwa byahise bisiga ikipe ya Manchester United ku mwanya wa 11 n’amanota 19. Izagaruka mu kibuga ku wa Gatandatu, tariki ya 07 Ukuboza 2024, izacakirana na Nottingham Forest kuri Old Trafford.

Arsenal yatsinze Manchester United ibitego 2-0

Ni umukino wakomeye cyane mu gice cya kabiri

Arsenal yanyuzwe no gutsinda Manchester United