Impamvu ba Meya barimo Richard Mutabazi na Ange Sebutege batemerewe kongera gutorwa mu Ukwakira
Mu gihe u Rwanda rwitegura amatora y'inzego z'ibanze ateganyijwe mu Ukwakira 2026, bamwe mu bayobozi b'Uturere bamaze kubaka amazina akomeye bijyanye n’igihe bamaze mu buyobozi barimo amazina nka Mutabazi Richard wa Bugesera na Ange Sebutege wa Huye ntibagomba kuzagaragara ku rutonde rw'abazahatana kubera impamvu twasesenguye.
Impamvu ituma aba bayobozi batakongera kuyobora utu turere ni uko bose barangije manda ebyiri zikurikirana, ari na yo ntarengwa iteganywa n'amategeko agenga amatora y'inzego z'ibanze, bityo ntibemererwe kongera kwiyamamaza muri aya matora. Ibi bivuze ko abatowe bwa kabiri muri 2021 bazaba barangije igihe ntarengwa bemerewe kuyobora.
Muri aba batemerewe kongera kwiyamamaza harimo Richard Mutabazi uyobora Akarere ka Bugesera, Ange Sebutege wa Huye, Jerome Rutaburingoga wa Gisagara, Valens Habarurema wa Ruhango, Jacqueline Kayitare wa Muhanga, Radjab Mbonyumuvunyi wa Rwamagana, Richard Gasana wa Gatsibo na Antoinette Mukandayisenga wa Nyabihu.
Harimo kandi Patrick Kajyambere wayoboye Akarere ka Nyanza asoza manda yasimbuyeho Erasme Ntazinda, na we utazongera kwiyamamaza nk'uko biteganywa n'itegeko.
Ku rundi ruhande, abayobozi bari muri manda yabo ya mbere baracyafite uburenganzira bwo kongera kwiyamamaza. Muri bo harimo Ildebrand Niwemwungeri wa Nyamagabe, Emmanuel Murwanashyaka wa Nyaruguru, Dr. Sylvere Nahayo wa Kamonyi, Phanuel Sindayiheba wa Rusizi, Narcisse Mupenze wa Nyamasheke, Gerard Muzungu wa Karongi, Dative Kayitesi wa Rutsiro, Vestine Mukandayisenge wa Gakenke, Judith Mukanyirigira wa Rulindo, Soline Mukamana wa Burera, Emmanuel Nzabonimpa wa Gicumbi, Claudien Nsengimana wa Musanze, Bruno Rangira wa Kirehe na Nathalie Niyonagira wa Ngoma.
INDI NKURU WASOMA : FDLR: Impamvu u Rwanda n'ibihugu byo mu Burengerazuba bw'Isi bitabona kimwe uyu mutwe witwaje intwaro
Mu gihe imyiteguro y'amatora ikomeje, Komisiyo y'Igihugu y'Amatora (NEC) iri guhugura abazagira uruhare mu matora no gushyira mu bikorwa itegeko rishya rigenga amatora. Hari kandi uturere twa Nyanza, Kayonza na Nyagatare tuyobowe by'agateganyo nyuma y'impinduka zabaye mu buyobozi, na two bikaba bitegereje kubona abayobozi bashya bazatorwa muri aya matora.
Aya matora azaba ari ingenzi mu kuvugurura ubuyobozi bw'inzego z'ibanze, aho bamwe mu bayobozi basoje urugendo rwabo nyuma ya manda ebyiri, mu gihe abandi bazasaba abaturage kongera kubagirira icyizere.
IGISUBIZO.COM twamenye ko Komisiyo y’Igihugu y’Amatora (NEC) yatangiye imyiteguro y’aya matora irimo guhugura abakorerabushake 17.717 bazafasha mu kuyategura no kuyakurikirana, hashingiwe ku itegeko rishya rigenga amatora ryatangiye gukurikizwa muri Gicurasi 2026.
What's Your Reaction?
