Umugaba Mukuru w’Ingabo z’u Burundi yasabye FLN gutera u Rwanda
Umugaba Mukuru w’Ingabo z’u Burundi, Gen. Prime Niyongabo, yasabye abarwanyi ba FLN kongera ibikorwa bigamije guhungabanya umutekano w’u Rwanda, abizeza ubufasha ndetse no kutazakomwa mu nkokora n’ingabo z’u Burundi zikorera mu gace ka Kibira, aho bamwe muri bo bivugwa ko bafite ibirindiro.
Amakuru mashya akubiye muri raporo nshya y’ikinyamakuru Great Lakes Eye agaragaza ko hari ubufatanye buri gukomera hagati ya Repubulika Iharanira Demokarasi ya Congo (RDC), u Burundi n’umutwe witwaje intwaro wa FLN, ibintu bishobora kongera impungenge ku mutekano w’u Rwanda ndetse n’akarere k’Ibiyaga Bigari muri rusange.
Raporo ivuga ko Umugaba Mukuru w’Ingabo z’u Burundi, Gen. Prime Niyongabo, yaba yarasabye abarwanyi ba FLN kongera ibikorwa bigamije guhungabanya umutekano w’u Rwanda. Bivugwa ko yabijeje ubufasha bw’ibikoresho ndetse anabizeza ko batazahungabanywa n’ingabo z’u Burundi zikorera mu gace ka Kibira, aho bamwe muri bo bivugwa ko bafite ibirindiro.
FLN ni umutwe witwaje intwaro wahujwe na Paul Rusesabagina, ndetse ukaba warashinjwe kugira uruhare mu bitero byagabwe mu Majyepfo y’u Rwanda hagati ya 2018 na 2019, byahitanye abaturage ndetse bikangiza ibikorwa byabo.
Nk'uko iki kinyamakuru ibitangaza, umwe mu bayobozi bakuru ba FLN, Maj. Gen. Antoine Hakizimana uzwi ku izina rya “Jeva”, ngo yemerewe kugenda no gukorera ibikorwa bye mu ishyamba rya Kibira adahungabanyijwe n’inzego z’umutekano z’u Burundi.
Raporo kandi ivuga ko FLN yashyizeho ibikorwa byo gukusanya inkunga mu gace ka Mugina mu Burundi, aho abayishyigikiye bahurira mu bikorwa bifitanye isano n’itorero rya Methodiste. Bivugwa ko ibyo bikorwa bifasha uyu mutwe kubona amafaranga n’ibikoresho byo gukomeza ibikorwa byawo.
INDI NKURU WASOMA :Ambasaderi w’u Burundi mu Bufaransa ashobora guhanwa nyuma yo kwifatanya n’abibuka Jenoside yakorewe Abatutsi
Ni kenshi abayobozi ba Kigali bakunze guhuriza ku ngingo yuko ubu bufatanye bushya bushobora kuba bushingiye ku mugambi mugari wo gukoresha imitwe yitwaje intwaro nk’uburyo bwo gushyira igitutu ku Rwanda, mu gihe RDC ikomeje guhangana n’igitutu mpuzamahanga kiyisaba guhagarika imikoranire n’imitwe irimo FDLR.
Mu masezerano mpuzamahanga aheruka kuganirwaho hagati ya DRC n’abafatanyabikorwa bayo, Kinshasa yasabwe gufata ingamba zigaragara zo gusenya ibikorwa bya FDLR no guhagarika ubufatanye ubwo ari bwo bwose n’uyu mutwe ugizwe n’abasize bakoze Jenoside yakorewe Abatutsi mu 1994.
What's Your Reaction?
