Eric Nshimiyimana ntakiri umutoza mukuru wa Bugesera FC
Ubuyobozi bw’ikipe ya Bugesera FC bwahamije amakuru y’uko bamaze gutandukana na Eric Nshimiyimana wari umutoza mukuru w’iyi kipe yari amaze gutoza imikino icumi ya shampiyona ya 2023-2024.
Nshimiyimana yagizwe umutoza mukuru wa Bugesera FC kuwa 26 Mutarama 2023 asimbuye Ndayiragije Etienne nawe wari wayivuyemo tariki ya 10 Mutarama 2023.
Tariki 10 Mutarama 2023 ni bwo Ndayiragije yatandukanye na Bugesera FC ku bwumvikane bw’impande zombi. Yasubiye iwabo mu Burundi aho tariki 25 yasinye amaseserano y’imyaka ibiri atoza Ikipe y’Igihugu, Intamba mu Rugamba.
Icyo gihe Ndayiragije yasize Bugesera FC imaze gukina imikino 16, iri ku mwanya wa 12 n’amanota 19 n’umwenda w’ibitego bibiri.
Nyuma y’imikino 10 ikipe ya Bugesera FC yari imaze gukina, ubuyobozi bwasanze uyu musaruro udashyitse kuko yari imaze kugeza amanota icyenda (9) kuko yatsinze imikino ibiri (2), inganya itatu (3), itsindwa itanu.
Tariki 26 Mutarama 2023 ubwo Eric Nshimiyimana yagirwaga umutoza mukuru wa Bugesera FC yari yahawe amasezerano y'umwaka umwe n'igice.
Bugesera FC kuri ubu izigamye ibitego bibiri (2) kuko yinjije 15, yinjizwa 13 bityo iyi mibare ikayishyira ku mwanya wa 13 ku rutonde rw’agateganyo rwa shampiyona ya 2023-2024.
Eric Nshimiyimana abaye umutoza wa gatanu watangiye shampiyona ariko akaba nibura adasoje imikino ibanza nyuma ya Nshimiyimana Maurice Maso wari uwa Etoile de l’Est, Yamen Zerfani watandukanye na Rayon Sports.
Abandi batoza bamaze gutandukana n’amakipe ni Petros Koukouras wari muri Kiyovu SC na Muhire Hassan wari muri Sunrise FC.
What's Your Reaction?
