Umujyi wa Kigali wibutse abayobozi n’abakozi bazize Jenoside yakorewe Abatutsi

Iki gikorwa cyo kwibuka cyabereye mu Busitani bw’Urwibutso buri ku Rwibutso rwa Jenoside yakorewe Abatutsi rwa Nyanza ya Kicukiro, kibanzirizwa no gushyira indabo ku kimenyetso cy’urwibutso rwa Jenoside kiri ku biro by’Umujyi wa Kigali.

Mu ijambo rye, Minisitiri w’Ubumwe bw’Abianyarwanda n’Inshingano Mboneragihugu, Dr. Jean Damascene Bizimana, yahumurije Abarokotse Jenoside bo mu cyahoze ari Perefegitura ya Kigali, ashimangira ko nubwo Jenoside yasize ibikomere bikomeye, ubuzima bwatsinze Jenoside, nk’uko bigaragazwa n’iterambere n’ibimenyetso biboneka ku Rwibutso rwa Nyanza ya Kicukiro.

Yagarutse ku mateka ya Komini za Nyarugenge, Kacyiru na Kicukiro, zari zigize Umujyi wa Kigali mu gihe cya Jenoside, avuga ko Perefegitura ya Kigali yashyizweho mu 1990 mu rwego rworoherezaga ubutegetsi bwariho gushyira mu bikorwa umugambi wo gutoteza no kwica Abatutsi.

Minisitiri Bizimana yavuze ko abayobozi ba Perefegitura n’aba Komini bahawe amabwiriza yo gufata, gufunga, gutoteza no kwica Abatutsi bitwaga ibyitso by’Inkotanyi. Yagarutse kandi ku buhamya bw’uwahoze ari Burugumesitiri wa Komini ya Nyarugenge, Bizimana Jean, wigeze kwemera uruhare yagize mu gutegura no kuyobora ibikorwa byo kwica Abatutsi, harimo n’ibitero byagabwe kuri St Paul na Ste Famille.

Yashimangiye ko Jenoside yakorewe Abatutsi yari umugambi wateguwe neza kandi ushyirwa mu bikorwa na Leta yariho icyo gihe, asaba Abanyarwanda gukomeza gusigasira amateka no kurwanya abayagoreka cyangwa abayapfobya.

Yagize ati: “Amateka nk’ayo, u Rwanda ntirwakwemera ko hagira ukomeza kuyagoreka cyangwa kuyahakana, kuko byaba ari ugushinyagurira Abarokotse.”

Yakomeje asaba Abanyarwanda gukomeza kubaka igihugu gishingiye ku bumwe, kuko ari yo nzira yo guha agaciro umurage w’abahagaritse Jenoside no kurinda ko amateka mabi yongera kwisubiramo.

Ku ruhande rwa Ibuka, Visi Perezida ku rwego rw’Igihugu, Muhongayire Christine, yagarutse ku mibereho y’Abatutsi mu gihe cya Jenoside, yibutsa ko benshi bizeye ubufasha bw’abaturanyi babo ndetse n’ahantu hafatwaga nk’ubuhungiro, ariko bikarangira bicirwamo.

Yavuze ko amateka abitswe ku Rwibutso rwa Jenoside rwa Nyanza ya Kicukiro agaragaza uburyo ingabo z’Umuryango w’Abibumbye zasize abaturage bari bazihungiyeho, bagahita bicwa n’interahamwe n’abasirikare ba Leta yateguye Jenoside.

Muhongayire yashimiye Inkotanyi zahagaritse Jenoside ndetse n’umusanzu zakomeje gutanga mu kubaka igihugu cyunze ubumwe kandi gitekanye.

Umuyobozi w’Umujyi wa Kigali, Samuel Dusengiyumva, yihanganishije imiryango y’abahoze ari abayobozi n’abakozi bo mu yari Perefegitura y’Umujyi wa Kigali n’Amakomini yari ayigize, bazize Jenoside yakorewe Abatutsi. Yavuze ko muri iki gikorwa hibutswe abantu bagera kuri 50.

Yashimangiye ko kwibuka abo bakozi n’abayobozi bifite intego yo kubunamira, kuzirikana ibikorwa byiza bakoraga no guha imbaraga imiryango yabo.

Yagize ati: “Umwanya nk’uyu wo kwibuka abari abakozi mu nzego turimo uyu munsi, udufasha gusubira mu mateka mabi yaranze ubuyobozi bw’u Rwanda kugeza kuri Jenoside yakorewe Abatutsi mu 1994, kugira ngo atazongera kwisubiramo ukundi, no kuzirikana ubutwari bw’Inkotanyi.”

Abitabiriye uyu muhango bongeye gushimangira ko gukomeza kuzirikana amateka ya Jenoside yakorewe Abatutsi no kuyigisha urubyiruko ari imwe mu nzira zo kurinda ko Jenoside n’ingengabitekerezo yayo byazongera kubaho, mu rwego rwo gukomeza kubaka u Rwanda rwunze ubumwe kandi rutekanye.

Twibuke, Twiyubaka.