Abakora ubukomisiyoneri bw'amazu badafite impushya bagiye kujya bakurikiranwa n'amategeko

Aya mategeko ari gutegurwa ku bufatanye na NLA, Ishyirahamwe ry'Abakora Umwuga w'Imitungo Itimukanwa mu Rwanda (RWAREB), Ikigo cy'Igihugu gishinzwe Imiturire (RHA) n'izindi nzego bireba.

Umuyobozi Mukuru wa NLA, Marie Grace Nishimwe, yabwiye ikinyamakuru The New Times  ko ibiganiro ku mushinga w'aya mategeko bikomeje kandi ko nibigenda neza azaba yamaze gutunganywa muri Nzeri uyu mwaka.

Yagize ati: "Turacyari mu biganiro byo gutegura aya mabwiriza, kandi nibigenda neza azaba yarangiye muri Nzeri."

Nishimwe yavuze ko aya mategeko azasobanura neza abantu bemerewe gukora ubukomisiyoneri bw'amazu n'imitungo itimukanwa ndetse n'ibisabwa kugira ngo bahabwe uburenganzira bwo kubukora.

INDI NKURU WASOMA : Uko kutagira umushahara fatizo bipyinagaza bikomeye ubukungu bw’u Rwanda

Perezida wa RWAREB, Joseph Rutiyomba, yavuze ko icyiciro cya mbere cy'aya mabwiriza kizibanda ku kugenzura abakora ubuhuza mu kugurisha no gukodesha imitungo itimukanwa, ndetse n'abayicunga.

Yasobanuye ko intego y'igihe kirekire ari uko ibikorwa byose biri mu rwego rw'imitungo itimukanwa, harimo n'abubatsi b'amazu, bizajya bigengwa n'amategeko amwe.

Rutiyomba yavuze ko nubwo RWAREB isanzwe ifite amabwiriza agenga imyitwarire n'imikorere y'abanyamwuga, kugeza ubu adafite imbaraga z'amategeko, bityo abakora amakosa ntibabihanirwe mu buryo bwemewe n'amategeko.

Ati: "Ikibazo dufite ubu ni uko amabwiriza yacu adafite imbaraga z'amategeko. Abayubahiriza babikora babyishakiye, ariko abatabikurikiza nta bihano by'amategeko bahabwa."

Mu mategeko mashya ateganywa, buri mukomisiyoneri cyangwa ucunga imitungo azasabwa kubanza kubona impamyabushobozi (certification) n'uruhushya rwo gukora (licence). Abazakora uwo mwuga mu buryo butemewe cyangwa biyitirira umwuga badafite ibyangombwa bazajya bakurikiranwa n'amategeko.