Nyiri urubuga rwa X, Elon Musk yashimiye Minisitiri w'Intebe w'U Buhinde kubera kuba igihangange kuri urwo rubuga

Ku wa Gatanu, tariki ya 19 Nyakanga 2024, nyiri urubuga rwa X, Elon Musk yakeje Minisitiri w'Intebe w'U Buhinde, Narendra Modi, nyuma yo guca agahigo ko kuba umuyobozi ukiyobora ku Isi ukurikirwa n'abantu benshi ku rubuga rwa X (rwahoze ari Twitter) akaba yujuje abamukurikira miliyoni 100, akurikira Uwahoze ayobora Leta Zunze Ubumwe z'Amerika, Barack Obama, ufite miliyoni 131.7.

Narendra Modi yatangiye gukoresha icyahoze ari Twitter ubu ni X, mu mwaka wa 2009. Yamaze kwinjira mu bantu bakurikirwa cyane kuri urwo rubuga rwa X, aho umubare w'abamukurikira wageze ku bantu miliyoni 100. Ibyo byatumye avugwa imyato na Elon Musk.

Yagize ati:"Ndagushimiye Nyakubahwa Minisitiri w'Intebe w'U Buhinde, Narendra Modi, kubera kuba umuyobozi ukurikirwa cyane ku  rubuga rwa X mubakiyobora ku Isi."

Yahise yanikira abandi bayobozi bayobora ibihugu bitandukanye hirya no hino ku Isi. Ari kure cyane ya Perezida wa Leta Zunze Ubumwe z'Amerika, Joe Biden ukurikirwa na miliyoni 38.1 kuri uwo rubuga rwa X, uwo yasimbuye Donald Trump akurikirwa na miliyoni 87.7, naho Perezida wa Turukiya (Turkey), Recep Tayyip Erdogan akurikirwa na miliyoni 21.5.

Si abo gusa yakubise inshuro, kuko yanikiye n'ibyamamare karundura kuri uyu mubumbe. Ari imbere y'umuhanga mu kwiruka, Virat Kohli akurikirwa na miliyoni 64.1, Neymar Junior akurikirwa na miliyoni 63.6, umukinnyi wa basketball muri Leta Zunze Ubumwe z'Amerika (NBA), LeBron James, akurikirwa na miliyoni 52.9.  

Yahaye umwitangirizwa kandi ibindi byamamare birimo Taylor Swift ukurikirwa na miliyoni 95.3, Lady Gaga akurikirwa na miliyoni 83.1, naho Kim Kardashian akurikirwa na miliyoni 75.2.

Minisitiri Narendra Modi akunzwe no kuri YouTube, akurikirwa n'abagera kuri miliyoni 25, agakurikirwa na miliyoni 91 ku rubuga rwa Instagram.

Dore batatu ba mbere bakurikirwa kurusha abandi ku rubuga rwa X 

Uri ku mwanya wa mbere ni nyirarwo, Elon Musk ukurikirwa na miliyoni 190, uri ku mwanya wa kabiri ni Uwahoze ari Perezida wa Leta Zunze Ubumwe z'Amerika, Barack Obama ukurikirwa na miliyoni 131.7. Uri ku mwanya wa gatatu ni umukinnyi w'umupira w'amaguru, Cristiano Ronaldo, akurikirwa na miliyoni 112.2.

Narendra Modi ni Ministiri w'Intebe w'U Buhinde