Jay Z ayobowe na Dangote: Urutonde rw'abaherwe b'abirabura 15 bakize cyane kurusha abandi ku Isi - AMAFOTO

Urutonde rw'abaherwe ku Isi yose rwihariwe n'abakire bo muri Nigeria n'abandi baba muri Leta Zunze Ubumwe z'Amerika. Ntabwo ubayoboye ari ku wundi mugabane utari uyu w'Afurika ufatwa nka gakondo y'abaturage bose birabura bawuriho n'abandi bari hirya no hino ku Isi, aba muri Afurika ni ho akorera ibikorwa bye byamukungahaje.

Uwo muntu ni uwitwa Aliko Dangote akaba akomoka mu gihugu cya Nigeria giherereye mu Burengerazuba bw'Afurika hazwi cyane kugira ubutaka burumbuka, ibirombe by'amabuye y'agaciro n'ibyambu bikungahaye dore ko bihana imbibi na Leta Zunze Ubumwe z'Amerika uciye mu nyanja ya Atlantic.

Ayoboye abandi bagwije ubukungu babukuye mu buhanzi, siporo, mu nganda n'ahandi. Dore urutonde rw'abo baherwe bavutse ari abirabura:

15. Tiger Woods

Uyu mugabo w'imyaka 49 ni rurangiranwa mu mukino wa golf wo muri Amerika. Ni umwibarura utuye muri Leta Zunze Ubumwe z'Amerika uza ku mwanya wa 15 akaba atunze agera kuri miliyari 1.4 y'Amadolari ya Leta Zunze Ubumwe z'Amerika.

14. Rihanna

Ni umuhanzikazi w'imyaka 37 ukomoka mu birwa bya Barbados ariko yagize umugisha wo kujya gukorera umuziki muri Amerika arakundwa cyane anasaruramo amafaranga menshi none atunze agera kuri miliyari 1.4 y'Amadolari y'Amerika.

13. Tyler Perry

Ni umukinnyi wa filime w'imyaka 55 wo muri Leta Zunze Ubumwe z'Amerika wakoreye amafaranga atari make. Ubu atunze agera kuri miliyari 1.4 y'Amadolari y'Amerika.

12. Tope Awotona

Ni umushabitsi w'imyaka 44 wo muri Nigeria wagiye gucururiza muri Leta Zunze Ubumwe z'Amerika ashora amafaranga mu bikorwa bijyanye n'ikoranabuhanga. Ubu atunze agera kuri miliyari 1.4 y'Amadolari y'Amerika.

11. Femi Otedola

Ni umuherwe w'imyaka 62 wo muri Nigeria akaba sebukwe w'umuhanzi, Mr. Eazi, abarirwa ko atunze agera kuri miliyari 1.5 y'Amadolari y'Amerika.

10. Magic Johnson

Ni umukire wo muri Leta Zunze Ubumwe z'Amerika wigeze gukina umukino wa basketball. Afite imyaka 66 akaba atunze agera kuri miliyari 1.5 y'Amadolari y'Amerika.

9. Jay Z

Ni umuraperi w'imyaka 55 wo muri Leta Zunze Ubumwe z'Amerika wamenyekanye mu ndirimbo: Empire State Of Mind, Young Forever, Drunk In Love n'izindi. Ni umugabo w'umuhanzikazi Beyonce. Ahagaze neza ku rwego rw'ubukungu kuko atunze agera kuri miliyari 2.5 z'Amadolari y'Amerika.

8. Patrice Motsepe

Ni umuyobozi w'Impuzamashyirahamwe y'umupira w'Amaguru muri Afurika (CAF) ukomoka muri Afurika y'Epfo. Ku myaka afite 63 y'amavuko atunze agera kuri miliyari 3 z'Amadolari y'Amerika.

7. Oprah Winfrey

Ni umukinnyikazi wa filime akaba umunyamakurukazi wo muri Leta Zunze Ubumwe z'Amerika ufite imyaka 71 y'amavuko. Uyu mugore ubera benshi mu bagore ikitegererezo atunze agera kuri miliyari 3 z'Amadolari y'Amerika.

6. Michael Jordan

Ni umunyabigwi mu mukino wa basketball ku Isi kuko yabaye rurangiranwa mu yo muri Amerika izwi nka NBA. Uyu mugabo w'imyaka 62 y'amavuko, abarirwa agera kuri miliyari 3.5 z'Amadolari y'Amerika.

5. Abdulsamad Rabiu

Ni umuherwe wo mu gihugu cyo mu Burengerazuba bw'Afurika, Nigeria. Abarirwa ko atunze agera kurimiliyari 5.1 z'Amadolari y'Amerika.

4. Mike Adenuga

Uyu na we akomoka mu gihugu cya Nigeria ufite imyaka 72 y'amavuko yashoye imari ye mu bikorwa by'ikoranabuhanga n'itumanaho bizwi nka Globacom. Acururiza mu bihugu byo muri Afurika birimo Ghana na Benin. Atunze agera kuri miliyari 6.8 z'Amadolari y'Amerika.

3. Robert F. Smith

Ni umuherwe wo muri Leta Zunze Ubumwe z'Amerika ufite imyaka 62 y'amavuko. Forbes yamushyize ku mwanya wa gatatu mu baherwe b'abirabura akaba atunze agera kuri miliyari 10.8 z'Amadolari y'Amerika.

2. David Steward

Ni umuherwe wo muri Leta Zunze UBumwe z'Amerika w'imyaka 74 y'amavuko. Ni we washinze ikigo "World Wide Technology" abarirwa agera kuri miliyari 11.4 z'Amadolari y'Amerika.

1. Aliko Dangote

Ni we mukire w'umwirabura washyizwe ku mwanya wa mbere n'urubuga rwa Forbes bahamya ko atunze agera kuri miliyari 23.9 z'Amadolari y'Amerika.

Ni umugabo w'imyaka 63 y'amavuko ukomoka mu gihugu cya Nigeria wakomeje kuyobora abandi birabura batunze amafaranga menshi. Imitungo ye ikomeza kuzamurwa n'ubucuruzi akora bw'isukari,amavuta, peteroli, sima n'ibindi.