Urugendo rudasanzwe rwa nyakwigendera Donatille Mukabalisa muri politiki
Mukabalisa Donatille wayoboye Umutwe w’Abadepite mu Nteko Ishinga Amategeko yitabye Imana ; dore urugendo rwe muri politiki y'u Rwanda rwaranzwe n'imirimo ikomeye yamaze imyaka irenga 20 akorera igihugu mu nzego zitandukanye.
Mukabalisa yavukiye i Nyamata, mu Karere ka Bugesera, muri Nyakanga 1960. Yize amategeko, akora nk'umwarimu muri Kaminuza Yigenga ya Kigali (ULK), anamara imyaka 16 akorera Ishami ry'Umuryango w'Abibumbye ryita ku Buzima (OMS/WHO) n'iryita ku Iterambere (UNDP).
Yinjiye muri politiki mu 2003, ubwo yatorerwaga kuba Umudepite mu Nteko Ishinga Amategeko y'u Rwanda. Yakoze izi nshingano kugeza mu 2008, mbere yo kugirwa Umusenateri kuva mu 2011 kugeza mu 2013.
Mu Ukwakira 2013, Donatille Mukabalisa yanditse amateka atorerwa kuyobora Inteko Ishinga Amategeko, Umutwe w'Abadepite, asimbuye Rose Mukantabana. Yayoboye uyu mutwe imyaka 11, kugeza mu 2024, asoza manda ebyiri zikurikirana nk'uko biteganywa n'amategeko.
Mu gihe yari Perezida w'Umutwe w'Abadepite, yagize uruhare mu kuyobora ibikorwa by'Inteko Ishinga Amategeko, gukurikirana ishyirwaho ry'amategeko no guteza imbere ubufatanye bw'Inteko y'u Rwanda n'iz'ibindi bihugu.
INDI NKURU WASOMA :Abana bahannye bidasanzwe umubyeyi wabo se nyuma yo kubima amafaranga yagurishije inka
Nyuma yo kurangiza manda ye muri Nzeri 2024, yagizwe Umusenateri, akomeza gukorera igihugu muri uru rwego.
Uretse inshingano ze mu Nteko Ishinga Amategeko, Mukabalisa yari anayoboye Ishyaka riharanira Ukwishyira Ukizana kwa Muntu (Parti Libéral - PL), aho yakomeje kugira uruhare mu miyoborere ya politiki y'u Rwanda.
Donatille Mukabalisa yasize amateka nk'umwe mu bagore bageze ku nzego zo hejuru z'ubuyobozi bw'igihugu, ndetse urugendo rwe muri politiki ruzahora rwibukwa nk'urwaranzwe no gukorera igihugu mu nzego zinyuranye zifata ibyemezo
What's Your Reaction?
