Umukinnyi w'iteramakofe wo muri Nigeria, Gabriel Oluwasegun yamburiwe ubuzima ku gice cya munani

Gabriel Oluwasegun wari umaze kubaka ibigwi mu mukino w'iteramakofe muri Nigeria no hanze yaho yapfuye urupfu rutunguranye nyuma yo guhenuka agwa ku migozi yari igose aho yarimo guhanganira na Mbanugu. Yajyanywe kwa muganga ahita yitaba Imana.

Amakuru TMZ yabonye avuga ko uwo mugabo yarimo ahangana n'undi ukomoka muri Ghana witwa Jon Mbanugu i Accra muri Ghana abantu bakabona arahenutse mugenzi we atamukozeho.

Uwarimo asifura uwo mukino, Richard Mevi yahise ahagarika uwo mukino. Oluwasegun yakuwe aho umukino warimo urabera kuri Bukom Boxing Arena ajyanwa ku bitaro biri hafi ahapfira mu minota 30.'

Ni inkuru yababaje abatari bake igera no mu bayobozi. Ukuriye ishyirahamwe ry'umukino w'iteramakofe muri Nigeria, Remi Aboderin yavuze ko bashenguwe n'urwo rupfu.

Ati:"Tubabajwe n'urupfu rwa Oluwasegun. Tuzakora uko dushoboye twihanganishe umuryango we."

Ni ikibazo cyatunguye buri umwe kuko bajya gukina uwo mukino babanje gupimwa basanga ni bazima.

Oluwasegun yatangiye umukino w'iteramakofe mu buryo bw' umwuga mu mwaka wa 2019. Yakoze ibikorwa bikomeye mu mukino w'iteramakofe aho mu mwaka wa 2023 yegukanye irushanwa ryawo ryo mu Burengerazuba bw' Afurika atsinze Simon Olayinka.

Oluwasegun yaguye i Accra muri Ghana