Ubuzima ntibutanga ibyo ushaka, ahubwo butanga ibyo wakoreye

Ubuzima bwigisha buri muntu nubwo butajya butanga ibyo twifuza gusa, ahubwo butanga ibyo twakoreye. Kwifuza ni intangiriro nziza, ariko gukora ni byo bihindura inzozi ukuri.

Hari abantu benshi baryama nijoro batekereza ejo hazaza heza. Batekereza inzu nziza bazabamo, ubuzima bwiza bazagira, ibikorwa bizabahesha ishema n'ubuzima buzira amakemwa. Ariko iyo bucya, bamwe bakomeza kurota gusa, abandi bakabyuka bagatangira gukora intambwe n'intambwe zibageza aho bashaka kugera.

Iyo urebye umurimyi, ntasarura ibyo yifuje. Asarura ibyo yabibye. Niba yarateye ibigori, ntashobora gusarura umuceri. Niba yarahinze neza, akuhira, akarinda imyaka ye, igihe cyo gusarura kigera afite umusaruro mwiza.

Ubuzima na bwo ni uko bumeze. Ntibubaza umuntu ibyo yifuje. Bubaza ibyo yakoze kugira ngo ibyo yifuza bibe impamo.

Hari igihe umuntu yumva ababaye cyane abonye undi muntu ageze ku rwego rwiza mu buzima. Akibaza ati: "Kuki njye nkiri hano?" Nyamara akenshi ntaba abona imyaka myinshi y'umuhati, amarira, kwigomwa no gukomeza uwo muntu yanyuzemo. Abona intsinzi gusa, ntabe abonye urugendo rurerure rwayibanjirije.

Nta musaruro ubaho nta mbuto yabanje guterwa. Nta ntsinzi ibaho nta rugamba rwabanje kurwanwa. Nta cyubahiro kibaho nta kwitanga kwabanje kubakwa.

Ikibabaza kurushaho ni uko hari abantu benshi bategereza impinduka ariko badashaka guhindura ibikorwa byabo. Bashaka ibisubizo bishya ariko bagakomeza gukora ibintu bya kera. Bashaka umusaruro utandukanye ariko bagakomeza kubiba imbuto zimwe.

Ubuzima ntibukora gutyo. Iyo ushaka impinduka, ugomba guhindura ibikorwa byawe. Iyo ushaka kugera ahandi, ugomba gufata indi nzira. Iyo ushaka umusaruro mushya, ugomba gutera imbuto nshya.

Hari igihe umuntu akora cyane ariko ntahite abona umusaruro. Aho ni ho benshi bacika intege. Bakumva ko ibyo bakora nta cyo bimaze. Nyamara ukuri ni uko hari ibintu byinshi bikura bitagaragara.

Iyo imbuto itewe mu butaka, iminsi myinshi ishira nta kigaragara hejuru. Ariko munsi y'ubutaka iba iri gushinga imizi. Iyo mizi ni yo ituma igiti kizakomera igihe kizaba kimaze gukura.

No mu buzima bwacu ni uko bimeze. Hari amasomo twiga uyu munsi azatugirira akamaro nyuma y'imyaka. Hari ibikorwa dukora uyu munsi bizadufungurira imiryango mu gihe kizaza. Hari amarira turira uyu munsi azavamo inseko ejo.

Nubwo umusaruro utahita ugaragara, nta gikorwa cyiza kijya kibura imbuto. Ni yo mpamvu umuntu atagomba kwibanda gusa ku byo yifuza, ahubwo agomba kwibaza buri munsi ati: "Ni iki nakoze uyu munsi kinyegereza aho nshaka kugera?"

Kubera ko inzozi zitagira ibikorwa zihinduka ibitekerezo gusa. Ibyifuzo bitagira umuhati bihinduka amaganya.

Ariko inzozi ziherekejwe n'akazi, kwihangana no gukomeza ziba amateka y'intsinzi.

Hari abantu bafite impano zidasanzwe ariko ntibakora. Hari abandi bafite ubushobozi busanzwe ariko bagakora ubudacogora. Akenshi, ubuzima buhemba uwa kabiri.

Si ukubera ko ari we wari ufite impano nyinshi, ahubwo ni ukubera ko yakoresheje neza icyo yari afite.

Ibi bitwigisha isomo rikomeye: ntabwo tugomba gutegereza igihe cyiza ngo dutangire gukora. Ahubwo tugomba gutangira gukora kugira ngo ejo hazaza heza tube ari twe tukarema.

Iyo umuntu ageze mu zabukuru, ntiyishimira cyane ibyo yifuje gukora. Yishimira ibyo yakoze. Nta muntu wishimira urugendo atigeze afata. Nta muntu wishimira intambara atigeze arwana.

Ubuzima buraduhamagarira gukora uyu munsi, kuko ejo hazaza hubakwa n'ibyo dukora ubu.

Niba ushaka icyubahiro, gikorere. Niba ushaka iterambere, rikorere. Niba ushaka amahoro, yaharanire. Niba ushaka guhindura ubuzima bwawe, tangira uyu munsi.

Kuko amaherezo, ubuzima ntibutanga ibyo ushaka gusa. Butanga ibyo wabibye, ibyo waharaniye, ibyo wakoreye n'ibyo wihanganiye.

Kandi umunsi umwe, igihe uzahagarara ukareba inyuma, uzasanga ibyo wagezeho atari impanuka. Uzamenya ko byaturutse ku ntambwe nto wafashe igihe abandi bari bagitegereje, ku muhati wakomeje gushyiramo igihe abandi bari baracitse intege, no ku kwizera wakomeje kugira igihe ibintu byose byasaga n'ibidashoboka.

Ni bwo uzasobanukirwa neza ko koko: "Ubuzima ntibutanga ibyo ushaka, ahubwo butanga ibyo wakoreye."

Philemon Burgin