Nimero ya mbere muri Tennis, Sabalenka yasubije Coco Gauff umaze kumutsinda inshuro ebyiri
Umukinnyikazi wa Tennis akaba nimero ya mbere mu bagore, Aryna Sabalenka watsinzwe na Coco Gauff amutwara igikombe cya French Open [ iryo rushanwa rizwi kandi nka Roland-Garros] ku wa 07 Kamena, yavuze ko yatsinzwe kubera amakosa yakoze ariko agiye kuyigiraho.
Aryna Sabalenka ukomoka muri Belarus yaciye ku mbuga nkoranyambaga yemera ko Umunyamerikakazi, Coco Gauff w’imyaka 21 yamurushije amayeri mu mukino bituma amutsinda yegukana French Open 2025 yaberaga mu Bufaransa.
Muri ubwo butumwa Aryna Sabalenka w’imyaka 27 yatanze ku Cyumweru tariki ya 08 Kamena nyuma ya tariki 07 Kamena yatsindiweho, yagize ati:”Ijoro ryakeye ryankomereye. Coco yabashije kuryitwaramo neza kundusha kandi yarakwiye kuryegukana rwose. Ku bw’ibyo rero, ndagira ngo mushimire kuko arabikwiye.”
Yakomeje agira ati:”Muranzi [… ] buri gihe ngerageza kuba umunyakuri ariko ndi umuntu mu byo nkora. Nakoze amakosa arenga 70, nagize umunsi mubi. Sinakinnye neza, Coco yabashije gukina neza, akinana intego arantsinda yegukana igikombe. Ndabimwubahira.”
Yasoje avuga ko agiye mu gihe cyo kuruhuka, kwihugura birushijeho azagaruke akomeye.
Amaze gutsindwa ku wa Gatandatu, tariki ya 07 Kamena, yumvikanye mu itangazamakuru avuga ko iyo undi mukinnyikazi Iga Swiatek aza kugera ku mukino wa nyuma yari gutsinda Coco Gauff.
Si ubwa mbere Gauff atsindiye Sabalenka ku mukino wa nyuma wa Tennis kuko mu mwaka wa 2023, Gauff yatsindiye Sabalenka kuri finale ya US Open.
Gauff amaze kwegukana French Open mu bagore yahise agera ikirenge mu cya Serena Williams wayegukanye mu mwaka wa 2015.
Coco Gauff w'imyaka 21 yegukanye French Open 2025
Aryna yavuze ko yakoze amakosa mu mukino bituma atsindwa
What's Your Reaction?
