Moses Turahirwa yasabye kugabanyirizwa igihano
Umunyamideli w’Umunyarwanda Moses Turahirwa washinze inzu y’imideli Moshions, yasabye Urukiko Rukuru kumugabanyiriza igihano akagihabwa gisubitse mu rubanza aregwamo gukoresha ibiyobyabwenge no guhindura inyandiko.
Turahirwa yajuririye icyemezo cyafashwe mu 2024 n’Urukiko Rwisumbuye rwa Nyarugenge rwamuhamije ibyaha byo gukoresha urumogi no guhindura inyandiko. Icyo gihe yakatiwe igifungo cy’imyaka itatu ndetse acibwa ihazabu ya miliyoni ebyiri z’amafaranga y’u Rwanda.
Mu iburanisha ry’ubujurire ryabaye ku wa 16 Werurwe 2026, Turahirwa yabwiye urukiko ko hari intambwe amaze gutera mu kwivuza no kwiyubaka, bityo asaba ko igihano yakatiwe cyasubikwa kugira ngo akomeze gahunda yo kuvurwa.
Yavuze ko hari ibihe yakoresheje urumogi ari mu bihugu byemera ikoreshwa ryarwo, birimo Italy na Kenya, ariko ko nyuma yaho yatangiye gushaka ubuvuzi ku bibazo by’ubuzima bwo mu mutwe.
Ku cyaha cyo guhindura inyandiko, Turahirwa yasobanuye ko cyaturutse ku ifoto ya pasiporo ye yahinduyeho amakuru akoresheje porogaramu yo gutunganya amafoto mbere yo kuyishyira ku rubuga rwa Instagram.
INDI NKURU WASOMA :Queen Kalimpinya yitwaye neza muri Safari Rally Kenya
Yavuze ko yahinduye amakuru arimo itariki y’amavuko, nimero ya pasiporo n’ikimenyetso cy’igitsina, ariko akavuga ko yabikoze mu rwego rwo gusetsa ku mbuga nkoranyambaga, atari ugukoresha iyo nyandiko mu bikorwa byemewe n’amategeko.
Icyakora, Ubushinjacyaha bwamaganye ubusabe bwe buvuga ko guhindura amakuru ari kuri pasiporo, yaba iy’ukuri cyangwa ifoto yayo, bishobora kuyobya abantu no gutesha agaciro inyandiko zemewe n’amategeko.
Urukiko rwavuze ko ruzatangaza icyemezo ku bujurire bwa Turahirwa ku wa 31 Werurwe 2026. Naramuka ahawe igihano gisubitse, ashobora kurekurwa nyuma yo kurangiza umwaka umwe w’igifungo ari gukorera.
What's Your Reaction?
