Mu gihe Jenoside yakorewe Abatutsi mu 1994 yabaga, amateka agaragaza ko amahanga yagize uruhare rukomeye mu kudahagarika ubwicanyi bwakorwaga, nubwo hari ibimenyetso byinshi byari byerekana ko bugiye kuba.

Agace ka Bisesero ni hamwe mu hagaragaje neza uko amahanga yananiwe kurengera abasivili. Aha ho Abatutsi bari bihagazeho barwana bashaka kwirwanaho, ariko ingabo z’Abafaransa zabahagezeho ntizibarengera, zibasiga mu kaga, ibintu byafashwe nk’ikimenyetso cy’uko amahanga yatereranye Abatutsi.

Mbere ya Jenoside, Umuryango w’Abibumbye, [UN], wari ufite amakuru ahagije agaragaza ko hari umugambi wo kurimbura Abatutsi. Kuva mu mpera za 1993, hari raporo zagaragazaga ikwirakwizwa ry’intwaro mu baturage, imyitozo ya gisirikare yahabwaga urubyiruko, ndetse n’imvugo z’urwango zakwirakwizwaga.

Nubwo ayo makuru yari ahari, ntihigeze hafatwa ingamba zihamye zo gukumira Jenoside. Ingabo za Loni zari mu Rwanda, zizwi nka UNAMIR, zari zifite ubushobozi buke kandi zifite inshingano zigarukira ku kurinda amahoro, ntizemererwa gufata ingamba zikomeye zo guhagarika ubwicanyi.

Umuyobozi w’izo ngabo, Romeo Dallaire, yagiye atanga amakuru kenshi agaragaza ko ibintu bigenda bihindura isura, asaba kongererwa ingabo no guhabwa uburenganzira bwo gutabara abasivili, ariko ntibyahawe agaciro.

INDI NKURU WASOMA :Ese kwigenga kw’intara za Kivu nibyo byatanga ituze rirambye mu burasirazuba bwa DRC?

Mu gihe Jenoside yatangiraga muri Mata 1994, amahanga ntiyigeze atabara ku gihe. Ahubwo ku wa 21 Mata 1994, Inama y’Umutekano ya Loni yafashe icyemezo cyo kugabanya umubare w’ingabo zari mu Rwanda, ibintu byatumye ubwicanyi burushaho gukwira hose.

Ikindi cyagaragaye ni uko amahanga yanze gukoresha ijambo “Jenoside”, ahubwo akoresha amagambo arimo “ubwicanyi bukabije” cyangwa “intambara y’amoko”, ibintu byatumye hatagira igikorwa cyihuse cyo kuyihagarika.

Ibi byose byatumye Jenoside yakorewe Abatutsi ifatwa nk’ikimenyetso gikomeye cy’uko amahanga yananiwe inshingano zo kurinda ubuzima bw’abantu.