FDLR mu myiteguro yo kongera kurasa muri Rubavu na Musanze

Aya makuru aje mu gihe amasezerano ya Washington yasinywe hagati y'u Rwanda na DRC mu mpera za 2025 yasabaga ko FDLR icibwa intege ndetse ikamburwa ubushobozi bwa gisirikare kugira ngo amahoro arambye aboneke mu karere.

Amakuru yatangajwe n'ikinyamakuru Great Lakes Eye avuga ko mu ntangiriro za Kamena 2026 habaye inama zahuje bamwe mu bayobozi b'ingabo za FARDC, abarwanyi ba FDLR ndetse n'imitwe yitwaje intwaro ikorana na Leta ya Congo.

Bivugwa ko muri izo nama haganiriwe ku buryo abarwanyi ba FDLR bashobora kwinjizwa mu mutwe wa Wazalendo kugira ngo umubare wabo utamenyekana byoroshye, ndetse no ku buryo bakomeza kubona amahugurwa n'ibikoresho bya gisirikare.

Andi makuru agaragaza ko imwe mu ngingo z'ingenzi zaganiriweho ari ugukomeza gushyira abarwanyi ba FDLR hafi y'umupaka w'u Rwanda no kongera ibikorwa byo kwinjira mu turere twa Rubavu na Musanze.

U Rwanda rumaze imyaka myinshi rugaragaza FDLR nk'umwe mu mitwe ibangamiye umutekano warwo, cyane ko ugizwe ahanini n'abasize bakoze Jenoside yakorewe Abatutsi mu 1994 ndetse n'ababakomokaho.

Mu myaka yashize, ibikorwa by'uyu mutwe byagiye bivugwaho kugaba ibitero ku butaka bw'u Rwanda, by'umwihariko mu Ntara y'Iburengerazuba n'iy'Amajyaruguru.

INDI NKURU WASOMA :CS Sfaxien na Espérance zinjiye mu rugamba rwo gusinyisha Niyigena Clement wa APR FC

Binatekerezwa ko gukomeza kubaho kwa FDLR no kubona ubufasha bishobora kudindiza gahunda z'amahoro mu karere, cyane cyane mu gihe hari impungenge ko ishobora kongera ibikorwa bya gisirikare hafi y'umupaka w'u Rwanda.

Kugeza ubu, nta rwego rwa Leta ya DRC ruragira icyo rutangaza kuri aya makuru, mu gihe ikibazo cya FDLR gikomeje kuba kimwe mu bibazo bikomeye birebana n'umutekano mu karere k'Ibiyaga Bigari.