CS Sfaxien na Espérance zinjiye mu rugamba rwo gusinyisha Niyigena Clement wa APR FC
Myugariro w’Amavubi, Niyigena Clément, ari mu bakinnyi bari kuvugisha benshi ku isoko ry’igura n’igurisha nyuma y’uko amakipe akomeye muri Tunisia arimo CS Sfaxien na Espérance de Tunis yinjiye mu rugamba rwo kumwegukana, ibintu byashyize igitutu kuri Ceramica Cleopatra yo mu Misiri yari yabanje kumwegera.
Uyu myugariro w'imyaka 25 y'amavuko amaze igihe yitwara neza haba mu ikipe y'igihugu no muri APR FC, ibintu byatumye aba umwe mu bakinnyi bakurikiwe cyane muri iri soko ry'igura n'igurisha ry'abakinnyi.
Nyuma y'umwiherero w'Amavubi wabereye mu Mujyi wa Cairo mu Misiri, Niyigena ntiyahise agarukana n'abo bari kumwe kuko yasigaye muri iki gihugu akomeza ibiganiro n'amakipe amwifuza.
Mu makipe yabanje kumugaragariza ubushake harimo ikipe ya Ceramica Cleopatra FC yo mu Cyiciro cya Mbere mu Misiri. Nubwo ibiganiro byari bigeze kure, amakuru avuga ko nta masezerano arashyirwaho umukono kugeza ubu.
Mu gihe byasaga nk'aho uyu mukinnyi yari hafi kwerekeza muri Ceramica Cleopatra, andi makipe akomeye yo muri Tunisia yahise yinjira muri uru rugamba.
Harimo Club Africain, CS Sfaxien ndetse na Espérance de Tunis, amakipe yose afite izina rikomeye ku mugabane wa Afurika.
Biravugwa ko Club Africain ari yo iri imbere mu biganiro byo gusinyisha Niyigena, ndetse ko yamwemereye amafaranga ari hafi gukuba kabiri ayo yari guhembwa mu Misiri. Uretse ibyo kandi, yamwemereye kuzakina irushanwa rya CAF Champions League nyuma yo kwegukana igikombe cya shampiyona.
Amakuru aturuka hafi y'uyu mukinnyi avuga ko yamaze kuva mu Misiri yerekeza muri Tunisia kugira ngo akomeze ibiganiro n'aya makipe, aho byemezwa ko ibiganiro hagati ye na Club Africain bigeze ku kigero cya 80%.
Nubwo bimeze gutyo, Espérance de Tunis nayo ntiracika intege. By'umwihariko umutoza mushya wayo, Laurențiu Reghecampf, bivugwa ko akunda cyane impano ya Niyigena kuko yanigeze gushaka kumusinyisha ubwo yari atoza ikipe ya Al Hilal Omdurman, ariko APR FC ikaburizamo uwo mugambi.
INDI NKURU WASOMA : Amateka yihishe inyuma y'ikipe ya Argentina idakunze kugaragaramo abakinnyi b'Abirabura
Mu gihe Niyigena ashobora gusohoka, APR FC nayo iri mu bihe bikomeye byo kugumana bamwe mu bakinnyi bayo b'ingenzi. Amakuru avuga ko Jean Bosco Ruboneka na Yunusu Nshimiyimana na bo batarumvikana n'iyi kipe ku masezerano mashya.
Bivugwa ko aba bakinnyi bombi basaba amafaranga atubutse yo gusinya ndetse n'umushahara urenga miliyoni enye z'amafaranga y'u Rwanda ku kwezi, ibintu bishobora kugora APR FC kubyubahiriza.
What's Your Reaction?
