Basketball: Abakinnyi banga gukinira ikipe y'igihugu bafatiwe ingamba zikaze
Nyuma y'iminsi havugwa abakinnyi banze kwitabira ubutumire bw'ikipe y'igihugu ya Basketball, ishyirahamwe ry'umukino wa basketball mu Rwanda, FERWABA ryafashe ingamba n'ibihano ku wo bizongera kugaragaraho.
Uyu ni umwe mu myanzuro yavuye mu nteko rusange y’iri shyirahamwe yabaye ku wa Gatandatu tariki 6 Ukuboza 2025. Mu mikino ikipe y'igihugu iheruka gukina mu gushaka itike y'igikombe cy'Isi cya 2027, ni bwo iki kibazo cyari cyagaragaye cyane aho hari abakinnyi banze kujyana na yo muri Tunisia.
Mu bakinnyi byavugwaga ko banze kwitabira ubutumire bw'ikipe y'igihugu, harimo abo muri APR BBC nka Ntore Habimana, Axcel Mpoyo, n'abandi.
Ibi byatunguye benshi mu bakunzi ba basketball mu Rwanda, bamwe bakabihuza no kuba ikipe nka APR isanzwe izwiho gutunga abakinnyi barangwa n'imyitwarire myiza ndetse bafasha cyane ikipe y'igihugu.
Mu kugaruka kuri iki kibazo cyari gihangayikishije abakunzi ba basketball, FERWABA yemejwe ko umukinnyi utazitabira ubutumire bw'ikipe y'igihugu, mu gihe ikipe ye asanzwe akinira yamutanze, azajya ahagarikwa umwaka umwe mu bikorwa bya basketball mu Rwanda.
Perezida wa FERWABA, Mugwiza Désiré ubwo yari ayoboye inteko rusange
What's Your Reaction?
