Dr Diane Gashumba yishimiye intsinzi ya Rayon Sports
Ambasaderi w'u Rwanda muri Suède, Dr Diane Gashumba, yagaragaje ibyishimo nyuma y'uko Rayon Sports itangiye neza urugendo rwayo muri CECAFA Kagame Cup 2026 itsinze KVZ SC yo muri Zanzibar ibitego 2-0.
Uyu mukino wabaye ku Cyumweru, tariki ya 26 Nyakanga 2026, kuri Stade Amahoro, aho Rayon Sports yerekanye umukino ushimishije, ibitego byayo bitsindwa n'abakinnyi bashya Kameni Junior na Muhoza Daniel.
Kameni Junior yafunguye amazamu kuri penaliti, mu gihe Muhoza Daniel yatsinze igitego cya kabiri ku mupira mwiza yari ahawe na Nshimiyimana Emmanuel uzwi nka Kabange.
Nyuma y'uyu mukino, abafana ba Rayon Sports bari bitabiriye umukino bakomeje kwishimira intsinzi yabo, aho bamwe bamaze hafi iminota 40 muri Stade Amahoro baririmba banishimira umusaruro mwiza ikipe yabo yabonye.
Ibyishimo ntibyagarukiye mu Rwanda gusa, kuko n'Abanyarwanda baba mu mahanga bagaragaje ko banyuzwe n'uko Gikundiro yatangiye iri rushanwa.
Mu bari bishimiye iyi ntsinzi harimo na Dr Diane Gashumba, usanzwe ahagarariye u Rwanda muri Suède, watangaje ko n'Abafana ba Rayon Sports baba mu bihugu byo mu Majyaruguru y'u Burayi bishimiye cyane iyi ntsinzi.
Abinyujije ku rubuga rwa X, yagize ati: "Si abafana bari mu rugo gusa! Natwe AbaRayoooo! bo mu bice by'Amajyaruguru y'Uburayi ndetse n'isi yose muri rusange turi kwishimira iyi ntsinzi. Ni intsinzi ikomeye! Twishimiye Gikundiro yacu."
INDI NKURU WASOMA : Abahoze bakinira APR FC bayitabarije nyuma yo kunyagirwa na Gor Mahia ibitego 5-0
Ubutumwa bwe bwakiriwe neza n'abakunzi ba Rayon Sports, benshi bamushimira kuba akomeje gukurikirana no gushyigikira ikipe n'ubwo ari mu nshingano zo guhagararira u Rwanda mu mahanga.
Dr Diane Gashumba yinjiye muri politiki imyaka myinshi ishize. Yabaye Minisitiri w'Ubuzima kuva mu 2016 kugeza mu 2021, mbere yo kugirwa Ambasaderi w'u Rwanda muri Suède, inshingano agikomeje kugeza ubu.
What's Your Reaction?
