DRC: AFC/M23, yongereye imbaraga mu gisirikare nyuma yo guha amahugurwa icyiciro gishya.

Uyu muhango wabereye mu kigo cya gisirikare cya Tshanzu giherereye mu gace ka Rutshuru, mu Ntara ya Kivu y’Amajyaruguru muri Repubulika Iharanira Demokarasi ya Congo.

Aba basirikare bashya basoje amahugurwa akomeye agamije kubategura kujya mu mirwano, aho bigishijwe amayeri atandukanye yo ku rugamba, imyitozo y’umubiri ikomeye, kurwana mu ntera ngufi n’ubundi bumenyi bujyanye n’akazi ka gisirikare.

Mu muhango wo gusoza iyi myitozo, bagaragaje ubushobozi n’imbaraga bavuga ko bungutse muri iyo myitozo.

Uyu muhango wayobowe n’umuyobozi w’ingabo za AFC/M23, Major General Sultani Makenga, witabirwa n’abayobozi bakuru ba gisirikare n’abandi bayobozi b’uyu mutwe.

Aha ni ho aba basirikare bashya barahiye ko bazakora akazi kabo mu izina ryo “kurengera abaturage no gusubiza agaciro igihugu”, nk’uko byatangajwe n’uyu mutwe.

Mu ijambo rye, Gen Makenga yanenze ubuyobozi buri i Kinshasa, abushinja imiyoborere mibi, ivangura no kunanirwa kurinda abaturage.

Yavuze ko AFC/M23 n’ingabo zayo, Armée Révolutionnaire Congolaise (ARC), byashinzwe mu rwego rwo guhagarika ihohoterwa rivugwa gukorerwa Abanye-Congo no gufasha impunzi n’abimuwe gusubira mu byabo.

INDI NKURU WASOMA :Aristide Mugabe yasezeye ku gukina Basketball nyuma y’imyaka 18

Yibukije aba basirikare bashya ko amahugurwa bahawe ahagije, abasaba kwitwara nk’abarinda abaturage, by’umwihariko abahunze igihugu cyangwa abimuwe mu byabo kubera intambara.

Yongeye gushima abasirikare basanzwe  ku mirongo y’imbere y’urugamba, avuga ko bageze ku ntsinzi zitandukanye mu mirwano, nubwo ayo magambo atigeze yemezwa n’inzego zigenga.

Abayobozi ba AFC/M23 batangaje ko umwaka wa 2025 wiyongereyeho umubare w’abinjira muri uyu mutwe, bakavuga ko n’umwaka wa 2026 biteganyijwe ko uwo mubare uzakomeza kwiyongera, babihuza n’uburakari bw’abaturage ku miyoborere y’igihugu.