Cyagizwemo uruhare na Madame Janet Museveni: The Ben agiye guhurira mu gitaramo n'abarimo Diamond Platnumz na Eddy Kenzo

The Ben uherutse gutaramira i Kampala mu gihugu cya Uganda yongewe mu bazataramira mu gitaramo cyiswe "Coffee Marathon" cyo kuzirikana akamaro k'abagore bo mu cyaro mu guteza imbere igihingwa cya kawa, azahuriramo n'abarimo Bebe Cool, Eddy Kenzo na Diamond Platnumz.

Ni igitaramo cyizabera mu gace ka Ntungamo ku wa Gatandatu tariki ya 24 Gicurasi 2025.

Nk' uko bigaragazwa n'icyapa cyamamaza icyo gitaramo, gihishura ko cyizaba ari igitaramo karahabutaka kuko cyizahurizamo abahanzi bakomeye bo mu Karere k'Afurika y'i Burasirazuba.

Hatangajwe ko kizataramamo umuhanzi nyarwanda, Mugisha Benjamin uzwi nka The Ben cyangwa se Tiger B, abahanzi bo muri Uganda ari bo: Bebe Cool, Eddy Kenzo, Ray G, Sister, Medotex Americana n'abandi.

Bananyarukiye muri Leta Zunze Ubumwe za Tanzania baganira na Diamond Platnumz abemerera kuzahaboneka agatangamo ibyishimo bisendereye.

Icyo gitaramo "Coffee Marathon" cyizabera i Ntungamo cyizagirwamo uruhare na kampanyi yitwa Inspire Africa Group ku bufatanye na Madame wa Perezida wa Uganda, Janet Museveni.

Ikindi wamenya kuri icyo gitaramo nuko Bebe Cool ari ku ruhembe rw' imbere mu bari kugitegura. Ashishikajwe no guteza imbere no kugeza imyidagaduro ku batuye mu cyaro, na bo baryoherwe n'umuziki w'abahanzi mpuzamahanga.

Cyizaba kandi mu mujyo wo kwizihiza igisata cy'ubuhinzi bw' ikawa ari nako hashimirwa uruhare rw' abagore bo mu cyaro mu guteza imbere ubuhinzi bwa kawa.

Abagore bafatwa nk'urutirigongo rw'iterambere rya kawa aho batanga umusanzu wabo mu ihingwa n'itunganywa ryayo ikagera ku isoko imeze neza.

Hazaba hagenderwa ku nsanganyamatsiko yatanzwe na Perezida Museveni muri uku kwezi kwa Gicurasi 2025 igira iti:"Gukura mu bukene abagore bo mu cyaro bakora ubuhinzi bw' ikawa."