BK Pro League : Asman Ndikumana wa Rayon Sports yaburiye APR FC
Rutahizamu wa Rayon Sports, Asman Ndikumana, yatangaje ko urugamba rwo guhatanira igikombe cya shampiyona y’icyiciro cya mbere mu Rwanda rugikomeje, ashimangira ko ikipe ye itaracika intege nubwo APR FC ikomeje kugira amahirwe menshi yo kwegukana igikombe.
Uyu mukinnyi ukomoka mu Burundi yabivuze nyuma yo gufasha Rayon Sports gutsinda Marines FC ibitego 2-1 mu mukino wabereye kuri Stade Kigali Pele ku wa Gatandatu, aho na we yatsinze kimwe muri ibyo bitego.
Nubwo APR FC iri mu mwanya mwiza wo kwegukana igikombe cya karindwi cyikurikiranya, Ndikumana yavuze ko Rayon Sports igomba gukomeza guhatana kugeza ku munota wa nyuma.
Yagize ati: “Turimo kwitegura umukino ku wundi. Intego yacu ni ugutsinda imikino yose isigaye kuko shampiyona ntabwo yoroshye. Tugomba gukora akazi kacu, ubundi tugategereza ko na bo batakaza amanota.”
Kugeza ubu, APR FC ifite amanota 59, kimwe na Al Merrikh, mu gihe Al Hilal iyoboye n’amanota 70. Gusa amakipe ya Al Hilal na Al Merrikh akina shampiyona nk’abatumirwa, bivuze ko ikipe y’u Rwanda iza ku mwanya wa mbere ari yo ihabwa igikombe.
INDI NKURU WASOMA : Trump yatangaje agahenge k’iminsi itatu hagati y’u Burusiya na Ukraine
APR FC ikeneye gutsinda nibura imikino ibiri mu isigaye kugira ngo ihite yegukana igikombe, ariko intsinzi ya Rayon Sports kuri Marines yatumye ibyo byishimo bisubikwa by’agateganyo.
Ndikumana yavuze ko muri shampiyona nk’iyi, ikipe iyo ari yo yose ishobora gutakaza amanota, anagaragaza icyizere ko na APR ishobora kugwa muri uwo mutego.
Yagize ati: “Icyizere kiracyahari. Ntidushobora kwiha akato tutaramenya ko byarangiye burundu. Tuzakomeza kurwana kugeza igihe bitazaba bigishoboka.”
Uyu rutahizamu yavuze kandi ko Rayon Sports iri gushyira imbaraga mu kuzamura urwego rwa buri mukino, haba mu gutsinda no kudatsindwa ibitego byinshi.
What's Your Reaction?
