Bizatwara hafi umwaka kugira ngo Ebola iri muri DRC ibonerwe urukingo
Ishami ry’Umuryango w’Abibumbye ryita ku Buzima (OMS) ryatangaje ko bishobora gufata hagati y’amezi atandatu n’icyenda mbere y’uko haboneka urukingo rwizewe rwihariye rw’ubwoko bwa Ebola ya Bundibugyo, virusi iri gukwirakwira muri Repubulika Iharanira Demokarasi ya Congo no muri Uganda.
Umuyobozi Mukuru wa OMS, Dr. Tedros Adhanom Ghebreyesus, yavuze ko kugeza ubu hamaze kubarurwa abantu 600 bakekwaho kwandura, mu gihe 139 bakekwaho kuba barahitanywe na yo, nubwo iyi mibare ishobora kwiyongera bitewe n’ubukererwe bwo kuyimenya no kuyisuzuma.
Dr. Tedros yavuze ati: “Turasuzuma ko ibyago biri ku rwego rwo hejuru imbere muri RDC no mu karere, ariko ku rwego rw’Isi bikiri hasi.”
Abashinzwe ubushakashatsi batangaje ko hari inkingo ebyiri zigeragezwa kuri ubu bwoko bwa Ebola, ariko zose ntiziragera mu igerageza ku bantu.
Dr. Vasee Moorthy, impuguke ya OMS, yavuze ko urukingo rwa mbere rushobora kuba rwiteguye gutangira gukoreshwa hagati y’amezi atandatu n’icyenda, mu gihe urwa kabiri rukiri mu ruganda ndetse rukaba rugomba kubanza kugeragerezwa ku nyamaswa mbere yo kujya ku bantu.
INDI NKURU WASOMA :Stephen Constantine yahishuye ikizasubiza Amavubi muri CAN
Ebola ya Bundibugyo yabonetse bwa mbere mu 2007 muri Uganda, nyuma yongera kuboneka muri DRC mu 2012. Nubwo itica cyane nk’ubundi bwoko bwa Ebola, kuba idakunze kuboneka bituma habura imiti n’inkingo zihagije zo kuyihashya.
What's Your Reaction?
