APR FC igiye gusinyisha kapiteni wa TP Mazembe, Rayon Sports yerekanye myugariro mushya
APR FC iri hafi kurangiza igikorwa gikomeye ku isoko ry'abakinnyi nyuma yo kumvikana na Madou Zon, kapiteni wa TP Mazembe. Mu gihe iyi kipe y'Ingabo ikomeje kwiyubaka, Rayon Sports nayo yamaze kwerekana myugariro mpuzamahanga wa Chad, Charles Tchouplaou, mu rwego rwo gukaza ubwugarizi bwayo mbere y'umwaka w'imikino wa 2026/27.
Amakuru agezweho aravuga ko APR FC yamaze kumvikana na myugariro ndetse n'umukinnyi wo hagati ukomoka muri Burkina Faso, Madou Zon, usanzwe ari kapiteni w'ikipe ya TP Mazembe yo muri Repubulika Iharanira Demokarasi ya Congo.
Uyu mukinnyi w'imyaka 27 bivugwa ko yemeye gusinya amasezerano y'imyaka ibiri muri APR FC, nubwo iyi kipe y'Ingabo z'Igihugu itaratangaza aya makuru ku mugaragaro.
Madou Zon yageze muri TP Mazembe muri Nyakanga 2023 avuye muri AS Douanes y'iwabo muri Burkina Faso. Mbere yaho yari yaranyuze muri Kassoum Ouédraogo Zico Académie.
Kuva yagera muri TP Mazembe yabaye umwe mu bakinnyi ngenderwaho b'iyi kipe yo mu mujyi wa Lubumbashi, aza no kugirirwa icyizere cyo kwambara igitambaro cya kapiteni.
Mu yandi makuru yo ku isoko ry'abakinnyi, Rayon Sports nayo yakomeje ibikorwa byo kongerera imbaraga ikipe yayo, itangaza ku mugaragaro ko yasinyishije myugariro mpuzamahanga wa Chad, Charles Tchouplaou.
INDI NKURU WASOMA :BK, Airtel cyangwa undi? Rayon Sports yavuze ku muterankunga mushya ishaka gusinyisha
Uyu mukinnyi w'imyaka 25 y'amavuko yageze muri Rayon Sports avuye muri Casric Stars FC yo muri Afurika y'Epfo.
Mu itangazo yashyize hanze, Rayon Sports yavuze ko yishimiye kwakira uyu myugariro ifata nk'ufite imbaraga n'ubushobozi bwo kuyifasha mu bwugarizi.
Charles Tchouplaou yavukiye muri Cameroon, afite uburebure bwa metero 1.99. Mbere yo kwerekeza muri Afurika y'Epfo muri Mutarama 2025, yari yarakiniye amakipe arimo CR Bernoussi yo muri Maroc, Colombe Sport na Apejes FC zo muri Cameroon.
Rayon Sports ikomeje kuba imwe mu makipe ari gukora cyane ku isoko ry'igura n'igurisha, kuko mbere ya Tchouplaou yari yamaze gusinyisha Umunye-Congo Abbel Matumona Wakonda Kanda wavuye muri Amagaju FC, Didier Nshuti wavuye muri Gorilla FC ndetse na Didier Ndayishimiye wari muri AS Kigali.
Hagati aho kandi, ikipe ya Sunrise FC yatangaje Camarade Banamwana nk'umutoza wayo mushya. Uyu mutoza aje gusimbura abari basanzwe bayitoza nyuma yo kuva muri Bugesera FC, aho yari amaze igihe akorera.
What's Your Reaction?
