Yegukanye Grammy! Ubuzima bwa Bensoul washyize hanze album iriho The Ben na Ariel Wayz

Benson Mutua Muia uzwi mu muziki nka Bensoul yamaze  gushyira hanze umuzingo w'indirimbo (album ) yise "The Party &The After Party.' Ni umuzingo uriho indirimbo 15, zirimo n'iz'abahanzi b'Abanyarwanda barimo The Ben na Ariel Wayz.

Bensoul umaze gukwiza ibigwi mu kwandika indirimbo no kumenya umuhanzi ufite impano ihambaye, kuri album ye yitabaje The Ben bakorana indirimbo 'Uno,' anakorana na Ariel Wayz indirimbo 'Mpaka che.'

Si bo bahanzi gusa yashyize kuri album ye, kuko yakoranye n'abandi barimo Harmonize, Nameless na Bien.

Bensoul ni inde?

Amazina ye bwite ni Benson Mutua Muia akaba yaramenyekanye mu muziki nka Bensoul. Ni umwanditsi w'indirimbo, utunganya indirimbo (music producer) akaba n'umuhanzi ukomoka ndetse uba muri Kenya.

Bensoul wamenyekanye cyane mu inzu yarebereraga inyungu itsinda rya Sauti Sol izwi nka 'Sol Generation ', yavutse ku wa O4 Werurwe 1996, avukira mu gace ka Embu ho mu gihugu cya Kenya.

Mu kiganiro na Standard Digital News yatangaje ko yatangiye gukunda umuziki ari umwana kubera ko papa we yari umuhanga mu bya gitari, byatumye amenya kuyicuranga akiga mu mashuri abanza. Mama we yaririmbaga muri korari. Yakuze akunda kumva injyana ya rumba, umuziki wo kuramya no guhimbaza Imana n'izindi.

Amaze gusoza amashuri yisumbuye, yagiye kuba mu murwa mukuru wa Kenya, Nairobi. Nyuma yaje guhura ndetse aba inshuti n'itsinda ryari rizobereye iby'umuziki ryitwa 'H Art The Band.'

Yakomeje gushaka aho yamenera mu muziki, ajya kwiga mu ishuri ryigisha ibyawo, ryitwa 'Sauti Academy,' agaragarizamo ubuhanga bahita bamusinyisha muri 'Sol Generation' yagengaga umunsi ku wundi ibikorwa by'itsinda rya Sauti Sol. Na we yahise amekana kubera izina rikomeye rya Sauti Sol bakoranaga.

Bensoul yahagiriye umugisha kuko hamufashije gukora umuziki, ndetse yandikira indirimbo abahanzi mpuzamahanga barimo Burna Boy.

Uyu muhanzi afatanyije na mugenzi we Bien-Aimé Baraza uzwi nka Bien Sol bagize uruhare mu kwandika album ya Burna Boy yise 'Twice As Tall' yagiye hanze mu mwaka wa 2020. Iyi album yatsindiye igihembo cya album nziza mpuzamahanga 'The Best Global music Album' mu itangwa ry'ibihembo bya Grammy Awards 2021. Abo banditsi na bo barazirikanwe nk'abanditsi beza ba 'Twice As Tall.'

The Ben yakoranye na Bensoul indirimbo bise 'Uno'

Umuhanzikazi nyarwanda, Ariel Wayz ni umwe mu bagaragaye kuri album ya Bensoul, bakoranye indirimbo 'Mpaka Che'

Bensoul ni umwe mu bahanzi b'abahanga igihugu cya Kenya gifite