Wema Sepetu yahamagajwe kubera kutikwiza
Umukinnyikazi wa filime wo muri Tanzania, Wema Sepetu yatumijwe n'ikigo gishinzwe sinema muri Tanzania ngo aze atange ibisobanuro ku myambarire ye bafata ko itamwubahisha.
Wema Sepetu wamenyekanye mu rukundo na Diamond Platnumz ariko akaza no kwihebera umwuga wo gukina sinema yagenewe ibaruwa imutumiza ku kigo gishinzwe ibijyanye na filime muri Tanzania kubera kwambara nabi, bamutegetse ko agomba kwitaba tariki ya 22 Gicurasi 2025.
Kuri uyu wa Kabiri tariki ya 20 Gicurasi 2025 nibwo hagiye hanze ibaruwa ivuye mu biro by'ikigo gishinzwe sinema muri Tanzania ivuga ko Wema Sepetu yakoze amakosa yo kwifotoza yambaye imyenda migufi cyane, yambaye atikwije.
Bavuga ko ayo mafoto amugaragaza yambaye mu buryo buteye isoni yasakajwe ku mbuga nkoranyambaga. Babona ari bibi kuko binyuranya n'indangagaciro z'Abanya-Tanzania. Nta muntu ukwiye kwambara ubusa ku gasozi.
Bityo, bahise bafata umwanzuro wo kumutumiza ngo azitabe ku kicaro cy'icyo kigo gishinzwe sinema giherereye i Dar Es Salaam ku wa Kane, tariki ya 22 Gicurasi 2025.
Iyo baruwa bayisoje basaba Abanya-Tanzania kwirinda kwijandika mu mico mibi barinda indangagaciro n'umuco muri rusange wa Tanzania.
Wema Sepetu yahamagajwe n'ikigo gishinzwe sinema muri Tanzania kubera kutikwiza
What's Your Reaction?
