Wari ubizi ko uteranyije amafaranga ya Messi na Ronaldo atagera ku ya Jay Z?

Muri iyi myaka, iyo uvuze abahanga ndetse na barurangiranwa mu mupira w'amaguru ku Isi, imbere haza Cristiano Ronaldo na Messi. Wumvise ibyabo ukareba n'igikundiro bafite wagira ngo ni abamiliyalideri. Ukuri ni uko bombi batanakwegera umuraperi wo muri Leta Zunze Ubumwe z'Amerika, Jay Z.

Ku bihebeye ruhago, usanga impaka ari nyinshi ku urenze undi mu buhanga hagati ya Messi na Cristiano Ronaldo!

Ni impaka zafashe indi ntera igihe Messi yakinaga muri F.C Barcelona, Cristiano Ronaldo akina muri Real Madrid. Ubu Cristiano Ronaldo asigaye akina mu ikipe yo muri Saudi Arabia yitwa Al Nassr naho Messi akina mu ikipe yo muri Amerika yitwa Inter Miami CF.

Amakipe bagiye bakinamo bahembwagamo amafaranga menshi abantu bakikanga ko baba batunze abarirwa muri za miliyari, ariko si ko bimeze.

Amakuru atangazwa n'imbuga zibara atunzwe n'ibyamamare nka Celebrity Net Worth, zivuga ko Umunya-Portugal, Cristiano Ronaldo atunze agera kuri miliyoni 800 z' Amadolari y'Amerika.

Ku rundi ruhande, Umunya-Argentina, Messi atunze agera kuri miliyoni 850 z' Amadolari y'Amerika.

Ayo mafaranga yabo yose uyateranyije aragwa muri miliyari 1 na miliyoni 650. Ibyo bihita biyagumisha hasi y'ay'umuraperi, Jay Z.

Umuraperi Jay Z uri mu bakomeye ku Isi abarirwa mu batunze arenga miliyari ebyiri (2) z' Amadolari y'Amerika. Uyu mugabo w'umuhanzikazi, Beyoncé atunze miliyari ebyiri (2) n'igice.

Imibare iragaragaza ko Jay Z w'imyaka 55 akize kurenza abo bafite ubuhanga mu gukina umupira w'amaguru, Messi na Cristiano Ronaldo.

Ubutunzi bwa Jay Z bwavuye mu buhanzi no mu bushabitsi yagiye akora ku ruhande. Ni we nyiri inzu ihuriyemo iby'umuziki n'indi mishinga izwi nka Roc Nation. Ni yo igira uruhare mu kugena umuhanzi uririmba mu gitaramo cyiba hagati y'umukino w'umupira w'amaguru wo muri Amerika cyizwi nka Superbowl Halftime show.