Uwahanze urubuga rwa TikTok ni we wikubiye ubukungu bw’U Bushinwa

Hashingiwe ku mibare yatangajwe n’urubuga ‘Hurun Research Institute’ iragaragaza ko umugabo witwa Zhang Yiming wahanze urubuga rwa Tik Tok ari we ukize kurusha abandi baherwe bo mu Bushinwa, dore ko atunze agera kuri miliyari 49.3 z’Amadolari ya Leta Zunze Ubumwe z’Amerika.

Mu mwaka wa 2021, Zhang w’imyaka 41 yatangaje ko avuye ku mwanya we wo kuyobora urwo rubuga ariko asobanura ko agifitemo 20%. Nyuma rwakomeje kwamamara ku buryo ubu ruri mu mbuga ziri gukundwa cyane n’urubyiruko rutuye hirya no hino ku Isi.

Nubwo rukomeje kwamamara ari nako rukiza banyirarwo, ibibugu bitandukanye birimo Leta Zunze Ubumwe z’Amerika byararwijunditse, Amerika yafashe umwanzuro ko nirutarekurwa na kompanyi yo mu Bushinwa irufite yitwa ‘ByteDance’ ngo rugurishwe ku Banyamerika, ruzahagarikwa gukoreshwa ku butaka bwayo muri Mutarama 2025.

Nubwo ruri mu biganiro n’Amerika, inyungu yarwo yazamutseho 60%, bituma abarufitemo imigabane nka Zhang Yiming imitungo yabo izamuka. Si aho gusa Zhang akura amafaranga kuko anafite n’ibindi bikorwa akora bijyanye n’itumanaho n’isakazabumenyi.

Hurun Research Institute ivuga ko Zhang Yiming utunze agera kuri miliyari 49.3 z’Amadolari, abaye umuherwe uyoboye abandi mushya wa 18 mu myaka 26. Bisobanuye ko bahora basimburanwa ku mwanya wa mbere, Zhang akaba ageze ku mwanya wa mbere ku nshuro ya mbere yarasimbuye bagenzi be, aba uwa 18 uje ari mushya ku mwanya wa mbere mu myaka 26 ishize.

Ibi bigaragaza umuco wo kutikubira n’ihererekanya mu bukungu ry’abaherwe b’Abashinwa. Mu Bushinwa bagira umuco wo gusangira ubukungu aho umukire aba yifuza ko umukene yatera imbere, ntashake kwikubira [communism].

Bitandukana n’aho abaherwe baba bashaka kugumana ubukungu, bakikubira, ntibashake ko abakene batera imbere [capitalism]. Uzasanga ahari ubwo buryo bwo kwikubira, umuherwe ashobora kumara imyaka irenga 10 ayoboye abandi baherwe, ntaba ashaka gusangira n’abandi baherwe.