Umuzamu wa Manchester United ni we uyoboye! Dore urutonde rw’abazamu bafite imikino myinshi yarangiye batinjijwe ibitego
Mu gihe ikipe ya Manchester United ikomeje kutitwara neza muri Shampiyona y’Abongereza [English Premier League], ikaba iri ku mwanya wa 14 n’amanota 8, umuzamu wayo ni we uyoboye abandi mu kwitwara neza mu izamu.
Umuzamu ukina muri Shampiyona y’Abongereza ukomoka mu gihugu cya Cameroon, Andre Onana akomeje kwerekana ubushongore n’ubukaka mu izamu rya Manchester United, ibintu bimugira umuzamu wa mbere mu Bwongereza umaze gutahana imikino myinshi atinjijwe igitego.
Nk’uko urubuga Premierleague.com rubitangaza, Andre Onana wageze mu ikipe ya Manchester United avuye mu ikipe ya Inter Milan ni we muzamu mwiza muri Shampiyona ikundwa n’abatari bake hirya no hino ku Isi [English Premier League].
Urwo rutonde ruhagaze rutya;
1.Andre Onana
Andre Onana ni we muzamu umaze kwitwara neza akaba afite imikino ine [4] atatsinzwemo igitego.
2. Alisson Becker
Uyu muzamu ukomoka mu gihugu cya Brazil akaba akinira ikipe ya Liverpool, ari ku mwanya wa kabiri n’imikino itatu [3] yabashije gucyura adatsinzwe igitego.
3. David Raya
Uyu we akomoka mu gihugu cya Esipanye akaba akinira ikipe ya Arsenal, amaze kwitwara neza mu mikino itandukanye ariko iyo yabashije gucyura adatsinzwe igitego ni itatu [3].
4. Nick Pope, Robert Sanchez, Matz Sels, Guglielmo Vicario
Aba bose; Robert Sanchez wa Chelsea, Matz Sels wa Nottingham Forest, Nick Pope wa Newcastle United na Guglielmo Vicario wa Tottenham Hotspur, bitwaye neza mu izamu batahana imikino ibiri [2] batinjijwe igitego.
Shampiyona y’Abongereza izakomeza imikino yayo y'umunsi wa 8 ku wa Gatandatu tariki ya 19 Ukwakira 2024.
What's Your Reaction?
