Umutoza wa Misiri yatuye intsinzi ya Australia abanye- Gaza

Misiri yabonye itike ya 1/8 cy'irangiza nyuma yo gutsinda Australia penaliti 4-2, nyuma y'uko iminota 120 yari yarangiye amakipe yombi anganya igitego 1-1.

Nyuma y'umukino, Hassan yabwiye abanyamakuru ko asabira abaturage ba Palestine gutsinda ibibazo barimo no kuzirikana abazize intambara.

Yagize ati: "Imana ibahe intsinzi kandi igirire impuhwe abahitanywe n'iyi ntambara. Ntuye iyi ntsinzi abaturage ba Misiri ndetse n'abaturage ba Palestine, abo bantu b'abanyacyubahiro."

Uyu mutoza yagaragaye yinjira mu kibuga yitwaje amabendera ya Misiri na Palestine nyuma y'umukino, mbere y'uko we n'abakinnyi be bapfukama bashimira Imana ku ntsinzi bari bamaze kubona.

Iyo ntsinzi yahise ikwirakwiza ibyishimo mu bihugu byinshi by'Abarabu, by'umwihariko mu gace ka Gaza gakomeje kwibasirwa n'intambara.

Amashusho yasakaye ku mbuga nkoranyambaga yerekanye abaturage bateraniye hamwe barebera umukino hagati y'inyubako zasenyutse n'amahema bacumbitsemo, bishimira buri gitego cya Misiri. Hari n'abana bari basize amarangi y'ibendera rya Misiri ku maso yabo mu rwego rwo gushyigikira iyo kipe.

INDI NKURU WASOMA : Rayon Sports yasozanyije na FIFA 

Umuturage wa Gaza witwa Tamer Nahed yanditse ku rubuga rwa X ko atari yarigeze akurikirana Igikombe cy'Isi yishimye nk'uyu mwaka.

Yagize ati: "Ibihumbi by'abantu byasohotse mu mahema no hagati y'amatongo y'inzu zasenyutse kugira ngo birebere umukino. Byari nk'aho abantu bahisemo kwibagirwa intambara by'igihe gito bakabaho ubuzima busanzwe."

Mbere gato y'uko umukino uba, hari habaye agahinda gato ubwo umuyobozi w'itsinda rya Misiri, Ibrahim Hassan, n'umukinnyi Trezeguet bashyamiranaga n'umupolisi i Dallas bashakaga kwifotozanya n'umufana. Icyakora Polisi ya Dallas yatangaje ko icyo kibazo cyahise gikemuka nta zindi ngaruka kibaye.