Umutoza wa Chelsea, Enzo Maresca yavuze impamvu ikipe ye itagambiriye igikombe cya shampiyona

Enzo uherutse kuramutswa ikipe ya Chelsea yo mu Bwongereza yahishuye ko akurikije uburyo ikipe ye ikiyubaka itari ku rwego rwo gutwara igikombe cya shampiyona y'Abongereza (English Premier League).
Ibyo yabitangarije mu kiganiro n'itangazamakuru cyabaye nyuma y'umukino batsinzemo mukeba wabo w'igihe kirekire Tottenham Hotspur ibitego 4-3.

Yagize ati:"Ikipe ntoza ya Chelsea ntabwo ishishikajwe no gutwara igikombe cya shampiyona y'Abongereza (English Premier League) kuko tukiyubaka."

"Dufite abakinnyi bafite imbaraga, bafite intego yo kwitwara neza ariko ntabwo navuga ko tuzatwara igikombe.

Uyu mutoza watungiye abafana b'ikipe yambara ubururu n'umweru yihebewe n'Abanyarwanda batari bake, yahamije ko nijya gutwara igikombe abantu bose bazabibona.

Ati:"Chelsea nijya gutwara igikombe muzabibona. Icyo gihe ntabwo izajya irindira iminota 10 kugira ngo ibone ibitego bibiri (2), iyo minota izajya igera yamaze kubitsinda. Iyo ni yo mikorere dushaka izatuma dutwara igikombe turi ku rwego rwiza."

"Mbona igikombe cy'uyu mwaka w'imikino wa 2024/25 cyiri guhatanirwa na Liverpool, Manchester City na Arsenal."

Biteganyijwe ko ikipe ya Chelsea izagaruka mu myitozo ku wa Kabiri, izaba iri kwitegura umukino wa 'Europa Conference League' izacakiranamo na Astana yo muri Kazakhstan ku wa Kane, tariki ya 12 Ukuboza 2024.

Izongera gukina Shampiyona y'Abongereza ku Cyumweru kuri sitade yayo ya Stamford Bridge, aho izakina na Brentford FC.

Hagati aho, Chelsea iri ku mwanya wa kabiri n'amanota 31; iri ku mwanya wa mbere ni Liverpool ifite amanota 35, naho ku mwanya wa gatatu hari Arsenal n'amanota 29.