Umushinwa yakatiwe gufungwa umwaka azira kwiba ibimonyo muri Kenya
Urukiko rwo mu mujyi wa Nairobi muri Kenya rwakatiye umushinwa witwa Zhang Kequn igifungo cy’umwaka umwe nyuma yo guhamwa n’icyaha cyo gushaka kwinjiza mu mahanga ibimonyo by’ubwoko bw’“queen garden ants” birenga 2,000 akoresheje inzira zitemewe n’amategeko.
Uyu mugabo yafatiwe ku kibuga mpuzamahanga cy’indege cya Nairobi ku wa 10 Werurwe 2026, agerageza kujyana ibi binyabuzima mu gihugu cye cy’u Bushinwa.
Urukiko rwamutegetse kandi gutanga ihazabu ya miliyoni imwe y’amashilingi ya Kenya, ruvuga ko atigeze agaragaza kwicuza ku byaha bye.
Umucamanza Irene Gichobi yagaragaje ko ibi byaha bigenda byiyongera, ashimangira ko hari isoko rikomeye ry’ibi bimonyo mu Burayi no muri Aziya aho bishakishwa cyane n’ababikusanya. Bivugwa ko ikimonyo kimwe gishobora kugura asaga amadolari 220.
INDI NKURU WASOMA :Ese hari icyatuma Louise Mushikiwabo ahigika umukandida wa DRC ku kuyobora OIF?
Zhang yemeye icyaha nyuma yo kubanza kugihakana, anavuga ko yaguze ibyo bimonyo ku munyakenya witwa Charles Mwangi, nawe ukurikiranywe n’amategeko.
Ubuyobozi bwa Kenya bwaburiye ko ubu bucuruzi butemewe bushobora guteza ingaruka mbi ku bidukikije, busaba ibihano bikakaye kugira ngo bicike. Biteganyijwe ko nyuma yo kurangiza igihano, Zhang azoherezwa mu gihugu cye.
What's Your Reaction?
