Umupolisi wahangaye Justin Timberlake yahembwe
Umupolisi witwa Michael Arkinson ubarizwa muri Sag Harbor y'i New York yahembwe kubera ko yahangaye icyamamare mu muziki, Justin Timberlake amukurikiranyeho gutwara yasinze.
Justin Timberlake yatawe muri yombi mu mpeshyi ya 2024 bamushinja gutwara imodoka yasinze. Umupolisi wamutaye muri kasho ya Polisi yahembwe na Sag Harbor Department nk'umupolisi w'umwaka.
Uwo mupolisi yahembwe n'umuyobozi we Chief Rob Drake amushimira ko ari umunyamwete, anakorana inshingano ze ubunyamwuga.
Timberlake yatawe muri yombi ku wa 17 Kamena 2024 bamufatiye mu muhanda wa New York, atangira gukurikiranwaho gutwara yasinze bakurikije uko bamubonye mu muhanda atwaye imodoka atubahiriza amategeko yawo agenda anayobagurika.
Uwo mupolisi, Arkinson yatanze ibimenyetso bivuga ko yabonaga yari yasinze akurikije uko yabonaga yari yatukuye amaso, asohora umwuka w'ibisindisha, anavuga gake.
Umunyamategeko wa Justin Timberlake yashimangiye ko umukiriya we atari yasinze.
Muri Nzeri 2024 nibwo iby'urwo rubanza rwa Justin Timberlake byashyizweho akadomo acibwa agera ku madolari y'Amerika 500 n'andi 260 anahanishwa kudatwarira i New York mu gihe cyingana n'iminsi 90.
What's Your Reaction?
