U Rwanda rurashinjwa guhonyora uburenganzira bwa Ingabire Victoire na Rusesabagina
Mu nama mpuzamahanga ya Oslo Freedom Forum ihuriza hamwe abaharanira uburenganzira bwa muntu n'abanyapolitiki batandukanye, u Rwanda rwongeye kuba ingingo y'ibiganiro. Abategura iri huriro bongeye kugaruka ku migendekere y'imanza za Victoire Ingabire na Paul Rusesabagina wahawe imbabazi, ibintu byakomeje guteza impaka ku ruhando mpuzamahanga.
Buri mwaka, ihuriro rya Oslo Freedom Forum rihuza hamwe abanyapolitiki, abanyamakuru n'abaharanira uburenganzira bwa muntu baturutse hirya no hino ku Isi, baganira ku bibazo bifitanye isano na demokarasi, ubwisanzure n'uburenganzira bwa muntu.
Muri uyu mwaka, bamwe mu bahawe umwanya wo kuvuga harimo abo mu miryango ya Victoire Ingabire na Paul Rusesabagina, bombi bakunze kuvugwa mu biganiro mpuzamahanga bivuga ku Rwanda.
Mu nama y'uyu mwaka, kimwe no mu byayibanjirije, u Rwanda rwongeye kugarukwaho binyuze mu biganiro byibanze ku mazina asanzwe amenyerewe mu ruhando mpuzamahanga, arimo Victoire Ingabire na Paul Rusesabagina.
Abitabiriye iri huriro barimo abahungu babiri ba Ingabire Victore ndetse Carine Kanimba ; umukobwa wa Paul Rusesabagina bagaragaje impungenge ku miburanishirize n'uburenganzira bw'aba bantu bavuga ko bazira impamvu za politike kurusha ukuri nubwo ariko hari n'abakomeje kwibaza impamvu akenshi hagarukwaho uruhande rumwe rw'inkuru, ibijyanye n'ibyaha bashinjwa cyangwa bakatiwe bikagirwa nk'ibidafite agaciro.
Victoire Ingabire akunze kuvugwa nk'umunyapolitiki utavuga rumwe n'ubutegetsi bw'u Rwanda. Icyakora, usibye ibikorwa bye bya politiki, yigeze guhamwa n'ibyaha n'inkiko z'u Rwanda, ndetse kuri ubu hari n'urubanza rushya aregwamo ibyaha birimo kurema umutwe w'abagizi ba nabi no gutegura ibikorwa bitemewe n'amategeko.
Ni nako bimeze kuri Paul Rusesabagina wamamaye ku rwego mpuzamahanga binyuze muri filime "Hotel Rwanda".
Mu Rwanda, yakatiwe n'inkiko ku byaha bifitanye isano n'iterabwoba nyuma yo guhamwa no kugira uruhare mu bikorwa by'umutwe wa FLN wigambye ibitero byahitanye abaturage mu Majyepfo no mu Burengerazuba bw'u Rwanda aza kurekurwa ku mbabazi z'umukuru w'igihugu nubwo abari bamushyigikiye biganjemo amahanga bavugaga ko urubanza rwe rwari rufite impamvu za politiki zirwihishe inyuma .
INDI NKURU WASOMA :Imyitwarire y'abarimo USA mu kibazo cy'umutekano muri DRC biri mu bikididinzia igerwaho ry'amahoro?
Leta ya Kigali igaragaza ko amashyirahamwe mpuzamahanga aharanira uburenganzira bwa muntu akwiye gushyira imbere amakuru yuzuye kugira ngo abantu babashe kwifatira imyanzuro yabo, aho kwerekana gusa uruhande rumwe rw'ibibazo.
Bemeza ko kunenga ubutegetsi ari uburenganzira bwa buri wese, ariko ko bidakuraho inshingano zo kubazwa ibyo umuntu akekwaho cyangwa yahamijwe n'amategeko.
What's Your Reaction?
