Trump yasabye ko amasezerano y'amahoro na Iran atakwihutishwa
Perezida wa Leta Zunze Ubumwe za Amerika, Donald Trump, yatangaje ko yahaye amabwiriza intumwa ziri kuganira na Iran kutihutira kugirana amasezerano, nubwo mu minsi ishize yari yavuze ko ibiganiro byari bigeze ku musozo.
Mu butumwa yashyize ku rubuga nkoranyambaga, Trump yavuze ko ibiganiro biri kugenda neza kandi mu buryo bwubaka, ariko ashimangira ko impande zombi zikwiye gufata umwanya uhagije kugira ngo hafatwe umwanzuro unoze kandi urambye.
Aya masezerano ari kuganirwaho bivugwa ko ashobora kuba arimo kongera iminsi 60 y’agahenge hagati y’impande zombi, kongera gufungura inzira y’amazi ya Strait of Hormuz ndetse no gukomeza ibiganiro birebana na gahunda ya Iran yo guteza imbere ingufu za nucléaire.
Ku wa Gatandatu, Trump yari yavuze ko ayo masezerano yamaze kuganirwaho ku rugero runini, ibintu byatumye benshi batekereza ko itangazo rya nyuma rishobora gusohoka vuba.
INDI NKURU WASOMA :Impamvu umuti BNR yavugitiye izamuka ry'ibiciro ku masoko ari ingenzi
Ku ruhande rwa Iran, ubuyobozi na bwo bwatanze ibimenyetso byerekana ko hari intambwe imaze guterwa. Umuvugizi wa Minisiteri y’Ububanyi n’Amahanga ya Iran, Esmail Baghaei, yavuze ko impande zombi ziri hafi cyane ariko na none zikiri kure yo kugera ku masezerano ya nyuma.
What's Your Reaction?
