Tigers BBC yegukanye igikombe cya mbere mu mateka
Ikipe ya Tigers Basketball Club yegukanye igikombe cyayo cya mbere mu mateka ndetse biyiha kuzahagarira u Rwanda mu mikino y'Akarere ka Gatanu (Zone V).
Ni igikombe yegukanye kuri uyu wa Gatanu tariki ya 3 Ukwakira 2025, nyuma yo gutsinda REG BBC ku mukino wa nyuma muri Rwanda Cup 2025, amanota 83-77.
Tigers yageze ku mukino wa nyuma isezereye APR BBC naho REG BBC igera kuri uyu mukino isezereye Kepler BBC. Ku mukino wa nyuma aya makipe yombi yakinnye, Tigers yagaragaje imbaraga ndetse iza kubasha kwegukana uduce dutatu muri tune dukinwa.
Muri uyu mukino, agace ka mbere Tigers yakegukanye ku manota 21 kuri 18 ya REG, aka kabiri, nanone Tigers ikegukana ku manota 20 kuri 13 ya REG maze bajya kuruhuka ikipe ya Tigers iri imbere mu giteranyo cy'amanota rusange.
Nyuma yo kuva mu kiruhuko REG BBC yaje igaragaza inyota yo kuba amanota menshi igakuramo n'ikinyuranyo, iza no kwegukana agace ka gatatu ku manota 32 kuri 24 ya Tigers BBC, gusa ikomeza kurushwa amanota.
Umutoza Henry Mwinuka ukomoka muri Tanzania ni we uhesheje Tigers igikombe cya mbere
Mu gace ka nyuma k'umukino, ikipe Tigers yongeye kugarukana imbaraga maze ikegukana ku manota 18 kuri 14 ya REG BBC, umukino urangira ari manota 83-77.
Iyi kipe ya Tigers BBC iyoborwa na Shyaka Francis (Suzuki) ari na we wayishinze, ni igikombe yegukanye bwa mbere mu mateka nyuma yo kwiyubaka cyane ikagura abarimo umutoza Henry Mwinuka watwaye ibikombe bigera kuri bitanu bya shampiyona mu Rwanda, abakinnyi nka Pitchou Manga n'abandi.
Uyu muyobozi w'iyi kipe aherutse gutangaza ko mu gihe cya vuba izegurirwa Ikigo cy'Igihugu gishinzwe Ubwiteganyirize (RSSB) yari isanzwe ari umuterankunga wayo.
What's Your Reaction?
