Ryitabiriwe n'umukobwa ufite inkomoko mu Rwanda: Dore ibihugu byegukanye inshuro nyinshi Miss Universe

Mu ijoro ryo ku wa 16 rishyira ku wa 17 Ugushyingo 2024 nibwo hazamenyekane umukobwa watsinze abandi mu irushanwa ry'ubwiza rya Miss Universe, hari ibihugu bimaze kuryegukana inshuro nyinshi kurenza ibindi. Ni mu gihe nta mukobwa urahagararira U Rwanda uretse ufite aho ahuriye na rwo.

Umukobwa witwa Kenza Johanna Ameloot uhagarariye igihugu cy'U Bubiligi yatorewe kuba Nyampinga w'U Bubiligi mu ntangiriro za 2024. Mu kumenya amateka ye, hahishuwe ko mama we ari Umunyarwandakazi washatse Umubiligi.

Miss Ameloot na we yarabihamije ubwo yongeraga gusura U Rwanda mu mpeshyi ya 2024, ahamya ko atari ubwa mbere arugezemo kuko yagiye ahagera mu bihe bitandukanye birimo no myaka ya za 2010, ndetse akunda n'indirimbo z'abahanzi nyarwanda nka Meddy.

Ku wa 29 Ukwakira 2024, yatangaje ko yamaze kwerekeza mu gihugu cya Mexique, yitabiriye irushanwa ry'ubwiza rya Miss Universe, yagiye ahagarariye igihugu ke cy'U Bubiligi, ariko Abanyarwanda barikurikiranira hafi bamuri inyuma.

Hagati aho, ikamba rya Miss Universe rigiye gutangwa ku nshuro ya 73, ariko U Rwanda ntabwo ruraryitabira.

Igisubizo.com yaguteguriye urutonde rw' ibihugu bimaze kwegukanwa iryo kamba inshuro nyinshi.

1. Leta Zunze Ubumwe z'Amerika

Ni irushanwa ryahiriye Abanyamerika dore ko ryigeze kuba mu biganza rya Donald Trump mbere yuko aba Perezida w’Amerika. Donald Trump yaritsindiye mu mwaka wa 1996, ashyirwaho igitutu ko agomba kurigurisha mu mwaka wa 2015 igihe yari mu myiteguro yo kwiyamamariza kuyobora Amerika. 

Byarangiye atsinze amatora ariko nyuma atsindwa ayo muri 2020, ubu yarongeye atsinda amatora yo muri 2024.

Kuva irushanwa rya Miss Universe ryatangira mu mwaka wa 1952 ryatwawe cyane n’abakobwa bo muri Leta Zunze Ubumwe z’Amerika, mu bihe bitandukanye ryatwawe n’abakobwa baho 9.

Abo bakobwa 9 ni : Miriam Stevenson (1956), Carol Morris (1957), Linda Bement (1960), Sylivia Hitchcock (1967), Shawn Weatherly (1980), Chelsi Smith (1995), Brook Lee (1997), Olivia Culpo (2012), na R'Bonney Gabriel (2022).

2. Venezuela

Iki gihugu kimenyerewe ku kugira abakobwa bahirwa no kwegukana amakamba y'ubwiza. Gifite abakobwa barindwi (7) begukanye ikamba rya Miss Universe mu bihe bitandukanye.

Ni Maritza Sayalero (1979), Irene Saez (1981), Barbara Palacios (1986), Alicia Machado (1996), Dayana Mendoza (2008), Stefania Fernandez (2009), Gabriel Isler (2013).

3. Puerto Rico

Ni igihugu cyo mu birwa bya Caribbean hafi ya Leta Zunze Ubumwe z'Amerika. Kigira abakobwa beza bakunda kwitwara neza mu marushanwa y'ubwiza. Ibyo byatumye kigira abakobwa batanu (5) begukanye amakamba ya Miss Universe.

Ryegukanwe na Marisol Malaret (1970), Deborah Carthy Deu (1985), Dayana Torres (1993), Denise Quinones (2001), na Zuleyka Rivera (2006).

4. Philippines

Iki gihugu cya Philippines cyibarizwa mu majyepfo y’umugabane wa Asia, cyahagarariwe n'abakobwa bitabiriye irushanwa rya Miss Universe, maze mu bihe bitandukanye abakobwa bane (4) babasha kwegukana iryo kamba.

Ni Gloria Diaz (1969), Margie Moran (1973), Pia Wurtzbach (2015), na Catriona Gray (2018).

5. Afurika y'Epfo, Ubuhinde, Mexique, na Suwede (Sweden)

Ibyo bihugu byombi bifite abakobwa baritwaye inshuro eshatu (3).

Afurika y'Epfo: Margaret Gardiner (1978), Demi-Leigh Nel-Peters (2017) na Zozibini Tunzi (2019).

U Buhinde: Sushmita Sen (1994), Lara Dutta (2000), na Harnaaz Sandhu (2021).

Mexique: Lupita Jones (1991), Ximena Navarrete (2010), na Andrea Meza (2020).

Suwede (Sweden): Hillevi Rombin (1955), Margareta Arvidsson (1966), na Yvonne Ryding (1984).

Urubuga rwa ‘Miss Universe’ rugaragaza ko ibihugu byagize abakobwa baritwaye ari 35 gusa.