Rudakubana ukurikiranweho kwicira abana batatu mu nzu ya Taylor Swift akurikiranweho ibindi byaha
Muri Nyakanga 2024 havuzwe inkuru y’Umunyarwanda, Rudakubana Axel uba mu Bwongereza ukurikiranweho kwica abana batatu abasanze mu nzu yigisha ibijyanye no kubyina y’umuhanzikazi wo muri Leta Zunze Ubumwe z’Amerika, Taylor Swift, iri mu Bwongereza. Ubu mu byaha ashinjwa hiyongereyeho ibindi.
Umunyarwanda, Rudakubana Axel watawe muri yombi mu mpera z’ukwezi kwa Nyakanga 2024 kubera gushinjwa kwivugana abana batatu yasanze muri studio ya Taylor Swift iherereye mu gace ka Southport mu Bwongereza, yongeweho ibindi byaha bibiri (2) bijyanye n’iterabwoba.
Ku wa 29 Nyakanga 2024 nibwo Polisi yo mu gace ka Merseyside ho mu Bwongereza yatangaje ko yamaze guta muri yombi umusore witwa Rudakubana Axel w’imyaka 18, akurikiranweho kwica abana batatu; umwe w’imyaka 6, 7 n’undi w’imyaka 9, abatsinze mu gace ka Southport muri studio yigisha umuziki ya Taylor Swift.
Ni igikorwa cyashenguye umuhanzikazi wo muri Amerika, Taylor Swift, maze aca ku rubuga rwa Instagram agira ati:”Ndababaye cyane. Aba bari abana bato cyane bari bafite intumbero yo kugera kure mu mwuga wo kubyina nk’uko bishwe ari byo barimo. Ndahombye ku buryo ntazi ukuntu nakwihanganisha iyo miryango yabo.”
Ku wa 29 Ukwakira 2024, Polisi yo muri icyo gihugu yatangaje ko uwo musore basanze hari ibindi byaha agomba gukurikiranwaho birimo gutunga uburozi buva mu bimera [cator bean] no guhabwa imyitozo n’umutwe w’iterabwoba ‘Al-Qaeda.’
TMZ yanditse ko nyuma y’ubwicanyi akekwaho gukora muri Nyakanga, Polisi yagiye gukora iperereza mu rugo rw’iwabo bahasanga uburozi n’impapuro zigaragaza ko yatojwe na Al-Qaeda. Ubwo burozi bukaba bufatwa nka bumwe mu burozi bwica cyane ku Isi.
Polisi ivuga ko icyo cyaha yakoze cy’ubwicanyi itaragishyira mu bikorwa by’iterabwoba kubera ko hagikusanywa ibindi bimenyetso.
Ku wa 30 Ukwakira nibwo Rudakubana aza kugezwa imbere y’ubutabera aho akurikiranweho kwica, kugerageza kwica; akekwaho kwica abantu batatu no gukomeretsa abandi 10, harimo kandi no gutunga icyuma/umushyo.
What's Your Reaction?
