Platin P yagaragaje uburyo yashenguwe n’ibyavuzwe ku muryango we

Mu mwaka wa 2023 nibwo umuhanzi Platin P ndetse n’umugore we hamenyekanye amakuru avuga ko nyuma yo gukora ubukwe mu mezi macye bagahita bibaruka, Platin yaje kumenya ko uyu mwana yaba atari uwe, ndetse ngo akaza kubyemezwa n’ibizamini by’uturemangingo ndangasano bya muganga bivuga ko umwana atari uwe, icyo gihe nibwo byatangiye kuvugwa ko baba bagiye gutandukana.

Nyuma abantu bakomeje kuvuga byinshi bitandukanye kuri uyu muryango gusa ibi byose bavugaga nta gihamya babaga babifitiye cyane ko nyuma nta yandi makuru y’uko iby’uyu muryango byaje kugenda yigeze amenyekana .

Platin P mu kiganiro samedi détente yagiranye na Radio Rwanda yatangaje ko yababajwe cyane n’ibintu byakomeje kuvugwa ku muryango we, cyane ko we ataba yifuza kuvanga ubuzima bwe bwite bw’umuryango n’umuziki, kuri we yumva ko ibibazo by’umuryango biba bigomba gukemurirwa mu muryango bitaje kuvangwa n’akandi kazi.

Yagize ati “Ikibazo gishobora kuvuka mu muryango ariko ntabwo ari byiza ko tubishyira hanze muri rubanda. Birumvikana ntabwo biba binejeje, ntabwo byanshimishije.”