Perezida wa FIFA agiye kureba bwa mbere umukino wa shampiyona y'u Rwanda

Ni umukino ugiye guhuza Gasogi United na AS Kigali kuri uyu wa Gatanu tariki 26 Ukuboza 2025. Uyu mukino w'umunsi wa 13 urabera kuri Kigali Pele Stadium, saa cyenda z'igicamunsi.

Perezida wa FIFA, Gianni Infantino araza kureba uyu mukino kwinjira byagizwe ubuntu ndetse ukaza kuba ari na wo mukino wa mbere arebye muri shampiyona y'u Rwanda. 

Infantino ari mu Rwanda aho yitabiriye igikorwa yahuriyemo na Perezida Kagame cyo gukundisha abana umupira w’amaguru ndetse no kubafasha kwidagadura cyiswe "FIFA Football Festival".

Iki gikorwa cyabereye muri Sitade Amahoro, gihuriza hamwe abana b'abahungu n'abakobwa bagera kuri 220 baturutse hirya no hino mu gihugu mu marerero 11 y'umupira w'amaguru.

Perezida Kagame na Gianni Infantino uyobora FIFA bagiranye ubusabane n'abana bakina umupira w'amaguru