Niyumva nk'uwatsinze: Tyson Mike yahishuye impamvu yahigitswe na Jake Paul

Mike Tyson watsinzwe na Jake Paul ku mugoroba wo ku Gatanu, tariki ya 15 Ugushyingo 2024 ari mu bihe byo kurwanirira izina rye, avuga ko yatsinzwe kubera ibihe bikomeye avuyemo birimo n’uburwayi.

Mike Tyson w'imyaka 58 yacakiranye na Jake Paul w'imyaka 27 wahoze akora ibiganiro byo kuri YouTube. Mbere yuko uwo mukino uba, byahishuwe ko Mike Tyson yaherukaga gukina umukino w'iteramakofe mu buryo bwo guhangana mu mwaka wa 2005. Yari yiyemeje ko agomba gutsinda (Jake Paul). 

Isaha y'umukino yarageze, baracakirana, nyuma y'ibice umunani (eight rounds) byo kurwana, Jake Paul ni we watsinze, amutsinda amanota 79-73. Ariko Mike yifata nk'uwatsinze.

Yaciye ku mbuga nkoranyambaga avuga ko mu ntangiriro z'uyu mwaka yari agiye kwitaba Imana, ibyo bituma ubu yiyumva nk'uwatsinze.

Yagize ati:"Iki ni cya gihe utsindwa ariko ukaba ugitsinda. Nishimiye ibyabaye mu ijoro ryatambutse. Iyo wahanganye n'umuntu bwa nyuma mu mukino w'iteramakofe, nta kwicuza kubamo."

Yakomeje atangaza ko yasimbutse urupfu. Ati:"Mu kwezi kwa Kamena, nari ndi hafi yo gupfa. Nageze aho nshyirwaho imipira umunani yanshyiragamo amaraso. Muzi ko ndi mu bitaro nabuze kimwe cya kabiri cy' amaraso yanjye, bakongeramo andi. Nararwanye ngo mbone ubuzima nkire, birangira ntsinzwe."

Mike yasoje agira ati:"Kuba nari ndi kurebwa n'abana banjye, mpagaze ku maguru abiri ndwana n'umunyempano w'umusore, ufite kimwe cya kabiri cy' imyaka yanjye, ndi muri sitade yuzuye ya 'Dallas Cowboy' (Dallas Cowboy Stadium) ni ubunararibonye buhebuje. Mwarakoze."

Kubera uburwayi bwa Mike, uwo mukino wasubitswe mu mpera za Gicurasi 2024, wimurirwa muri Nyakanga 2024, nabwo urasubikwa birangira wimuriwe mu Ugushyingo 2024.

Mike Tyson yatsinzwe na Jake Paul amanota 79-73