Nimuhaguruke twubake! Padiri Eugene yahamagariye Abakirisitu kubaka kwa Yezu Nyirimpuhwe

Padiri Eugene Niyonzima uri mu muryango w’Abapadiri b’Abapalotini bashinzwe kwita ku Ngoro ya Yezu Nyirimpuhwe iherereye mu Karere ka Ruhango yagarutse ku byiza n'ibyakorewe muri iyo Ngoro yo mu cyibaya cya Ruhango, anamenyesha ko haherutse guhagarikwa by’agateganyo kubera ko hari ibyo hatujuje, ahamagarira Abakirisitu gutanga umusanzu wabo mu kuhubaka hongere hateranire imbaga.

Ku wa Gatandatu tariki ya 17 Gicurasi 2025 nibwo Urwego rw' Igihugu rw’Imiyoborere (RGB) rwatangaje ko rwahagaritse by'agateganyo amasengesho abera ku Ngoro yo kwa Yezu Nyirimpuhwe muri Diyosezi ya Kabgayi mu Karere ka Ruhango mu Ntara y'Amajyepfo. 

Hahagaritswe kubera ko hatujuje ibisabwa bijyanye no kubungabunga umutekano w'abahateranira. Byatewe kandi n'umuvundo w'abantu benshi wahabaye utuma bamwe bahakomerekera  ku wa 27 Mata 2025.

RGB yahise ifata umwanzuro wo guhagarika by'agateganyo amasengesho ngaruka kwezi yahaberaga.

Padiri Eugene Niyonzima yaciye ku muyobora wa YouTube wa "Ingoro ya Yezu Nyirimpuhwe" ahamya ko hahagaritswe by'agateganyo, ariko Abakirisitu bakwiye kugira icyo bakora kugira ngo huzuze ibisabwa.

Ati:"Nkoramutima za Yezu Nyirimpuhwe nimuhaguruke duhuze imbaraga twubake ikibaya cyacu cy'amahoro."

Yakomeje yifashisha ibyanditse mu gitabo cya Nehemiya. Nk' uko bigaragara muri icyo gitabo, Yerusalemu yari yubatsemo Ingoro nziza cyane igakundwa n'abatari bake ku buryo n'abataremanyaga n'iyobokamana ry'Abayisilaheri batangazwa n'ubwiza bwayo. Ariko nyuma yaje kwangirika inkike zayo zirangirika ishiramo imyugariro.

Aho rero ni ho umuhanuzi Nehemiya yahagurutse atumira abo yatumweho ngo nimuhagurutse twubake inkike ya Yerusalemu (biri mu gitabo cya Nehemiya 2:17 no mu yindi mirongo).

Ashimangira ko Ingoro ya Yezu Nyirimpuhwe mu Ruhango ari imwe mu mazingiro y'iyobokamana mu Rwanda no mu Karere n'ahandi.

Iyo Ngoro ikaba iherutse gushyirwa mu rwego rw' Ingoro mpuzamahanga. Uretse n'ibyo Ikibaya cy'Amahoro cya Ruhango cyirahirwa n'abahageze bakicuza maze bagataha baruhutse.

Avuga ko ku giti cye yahakuye amahoro ndetse n'ingabire y'Ikirenga y'Ubusasirodoti. Hari n'abandi bahakiriye indwara zirimo ubugumba, abandi baharonkeye abakunzi.

Padiri Eugene yashingiye ku byiza byaho akangurira buri Mukirisitu kugira ibye ibyo bijyanye no kuhubaka hongere hemererwe kuhateranira.