Musigeho! Kanye West arashaka guhosha intambara y'amagambo hagati ya Donald Trump na Elon Musk

Perezida wa Leta Zunze Ubumwe z'Amerika, Donald Trump yatunguranye avuga ko ari kubabazwa cyane n'umuherwe Elon Musk uri kwigwizaho imitungo asahura Leta. Uwo muherwe yamusubije ko umurengwe wica nk' inzara, ari we wamugejeje ku mwanya w'umukuru w'igihugu.

Ni ibikubiye mu magambo bari gusangiza abakoresha imbuga nkoranyambaga aho Donald Trump yamwihaye avuga ko Elon Musk akwiye gukumirirwa kure.

Ati:"Inzira yoroshye cyane yo kwizigama amafaranga mu kigega cyacu, ingengo y'imari, tukabika amamiliyari n'amamiliyari y'Amadolari ni ugusesa amasezerano y'imikoranire Elon Musk afitanye na Guverinoma. Naratunguwe no kuba Joe Biden atarabikoze!"

"Namusabye gukuramo akarenge ke. Nakuyeho ibye byo gutegeka buri muntu kugura  imodoka ikoresha ingufu z' amashanyarazi, erega nta n'umuntu wazishakaga. Narabikoze mbona aribyimbije, ararakara!"

Elon Musk yagaragaje ko yababajwe n'ibyo byemezo byamufatiwe ubundi anyarukira kuri X avuga ko ari we wamugize Perezida, iyo atahaba yari gukubitwa inshuro na Kamala Harris bari bahanganye mu matora yo mu Ugushyingo 2024.

Ati:"Iyo ntahaba, Trump yari gutsindwa amatora. Abo mu ishyaka ry'Abademokarate (abo mu ishyaka rihangana na Donald Trump) bari kuba bagenzura White House."

Umuraperi Kanye West utajya uripfana na we yaciye ku mbuga nkoranymbaga agira ati:”Bavandi, musigeho gushwana. Mwese turabakunda cyane.”

Forbes iherutse gutangaza ko ubukungu bwa Elon Musk rukomeje gutumbagira cyane, atunze arenga miliyari 400 z' Amadolari.

Mbere y'uko akorana na Donald Trump yabarirwaga muri miliyari zirenga 250 z’Amadolari, ariko nyuma yo gukorana na we umutungo we uri kuzamuka cyane. Ari gushinjwa gusahura igihugu, we akavuga ko ava mu gukora cyane.

Perezida Donald Trump ari gufata ibyemezo bikomeye aho yacyuye abimukura baba muri Amerika badafite ibyangombwa, yikoma abatinganyi, akuraho ibigo bitanga imfashanyo muri Afurika (mu buzima, ubucuruzi, mu kurinda ibidukikije n'ibindi) arashaka no gukomanyiriza, ntibemererwe kugera muri Amerika, abaturage bo mu bihugu 12 byo hirya no hino ku Isi.

Zabyaye amahari hagati ya Donald Trump na Elon Musk bahoze ari inshuti magara