Minisitiri yabashimiye! Abana b’i Rwanda bahanze ibihangano bigaragaza amateka y’umukino wo gusiganwa mu modoka- Amafoto

Mu gihe mu Rwanda hari kubera Inama y’Inteko Rusange y’Ishyirahamwe Mpuzamahanga ry’Umukino wo gusiganwa mu modoka ku Isi (FIA), hari abayibyaje umusaruro bakora ibihangano bigaragaza amateka y’uwo mukino.

Bamaze kubimurika byahise bisakazwa ku mbuga nkoranyambaga bishimisha abatari bake.

Minisitiri w’Urubyiruko n’iterambere ry’Ubuhanzi, Dr. Jean Nepo Abdallah Utumatwishima yaciye ku rubuga rwa X abisangiza abakoresha urwo rubuga agaragaza ko yanejejwe n’ibyo bagezeho.

Yagize ati:”Aba bagize urubyiruko, bahembwe uyu munsi ku bihangano byiza byerekana amateka ya FIA.”

“Igihangano cyabaye icya mbere cyizashyirwa mu biro bikuru bya FIA nk’amateka ko inama ya mbere ya FIA yabereye ku mugabane w’Afurika mu Rwanda. Dushimiye ishuri rya Nyundo kuko aba bose ni ho bize.”

Yashimiye Perezida Paul Kagame uha amahirwe urubyiruko rukagira ibitekerezo bigari.

Ati:”Dushimiye Perezida wacu ku mahirwe ahabwa urubyiruko rukagira ibitekerezo byagutse byubaka U Rwanda twifuza, nko kuzana iyi nama ya FIA bwa mbere ku mugabane w’Afurika.”

Abo bagize urubyiruko, bagaragaje ndetse bashimirwa ibishushanyo byerekana amateka y’umukino wo gusiganwa ku modoka nto ufite umuzi ku mugabane w’i Burayi.

Minisitiri Dr. Utumatwishima yaciye ku rubuga rwa X ashimira Perezida Kagame n'urwo rubyiruko rwabyaje umusaruro amahirwe rwahawe

Bamuritse ibihangano bigaragaza amateka y'umukino wo gusiganwa mu modoka nto