Michelle Obama yahishuye uko Barack Obama yagowe no kumenya kubahiriza igihe

Michelle Obama warushinze n'uwahoze ari Perezida wa Leta Zunze z’Amerika, Barack Obama yavuze ko kimwe mu bintu byagoraga umugabo we ari ugukorera ku gihe. Yanatunguwe n'icyemezo yafashe cyo kwiyamamariza kuba Perezida w'Amerika.

Mu kiganiro “IMO Podcast,” Michelle Obama yagiranye na musaza we, Craig Robinson, yavugiyemo ibintu byaranze Barack Obama, harimo ibyo kutubahiriza igihe

Yagize ati:"Barack yagize umwanya wo kwiga gukoresha igihe neza. Twajyaga kugenda tuvuye mu rugo akavuga ngo akeneye ikintu. Nkamubwira ngo niba tugiye kugenda tugiye kugenda, ibyo wagakwiye kuba wabikoze. Ntabwo ari cyo gihe cyo kubikora. Ibyo byakomeje kudushyamiranya ariko nyuma aramenyera."

Yikije ku kamaro k'uwo musaza we, Craig wamufashije kumva ko Obama akwiye kwiyamamariza kuba Perezida w'Amerika.

Ati:"Ni wowe watumye numva ko nkwiye kumushyigikira mu kwiyamamariza kuba Perezida na ho ubundi nari nabyanze. Yishimiye kuba naramushyigikiye atsinda amatora nta kabuza."

Yakomeje avuga ko uwo Craig ari we wamufashije kuba mu nzu y'umukuru w'igihugu w'Amerika izwi nka White House.

Atanze icyo kiganiro mu gihe bivugwa ko umubano we na Barack Obama utifashe neza. Ibyo bivugwa hashingiwe ku byagaragaye mu ruhame.

Ku wa 20 Mutarama 2025, Barack Obama yitabiriye irahira rya Perezida Donald Trump yari wenyine mu gihe abandi bagabo bari kumwe n'abagore babo.

Barack Obama yagiye kandi mu ishyingurwa ry'uwahoze ari Perezida w'Amerika, Jimmy Carter atari kumwe na Michelle Obama.

Aherutse kugaragara ku mu kino w'ikipe ya basketball, Clippers yicaye ari wenyine. Ni ibintu bitandukanye nuko yagaragaraga mbere ari kumwe n'umugore we, Michelle Obama.

Bitiza umurindi abakomeje kuvuga ko aba bombi batakibana nk'umugabo n'umugore. Gusa muri abo bombi ntawurabitangaho ukuri.