Menya abaherwe 3 batunze arenga miliyari 200 z'Amadolari ($200 billion) n'aho bayakura

Urubuga 'Forbes' ruvuga ko mu barenga miliyari 8 batuye Isi, abari mu batunze miliyari z'Amadolari ari 2,781. Muri abo na bo abatunze ari hejuru ya miliyari 200 z' Amadolari ni 3; Elon Musk, Mark Zuckerberg na Jeff Besoz.

Ku wa 26 Nzeri 2024, urubuga 'Bloomberg' rwashyize hanze urutonde rw'abaherwe bo kuri uyu mubumbe, maze rugaragaza ko utunze amafaranga menshi ku Isi ari nyiri inganda zitandukanye zirimo Space X, Starlink na Tesla, witwa Elon Musk akaba atunze agera kuri miliyari 270 z' Amadolari ya Leta Zunze Ubumwe z'Amerika.

Uyu akurikirwa na nyiri uruganda kabuhariwe rukora ibirimo ubucuruzi bwo ku ikoranabuhanga ruzwi nka 'Amazon' witwa Jeff Besoz. Uyu abarirwa mu mafaranga angana na miliyari 215 z' Amadolari.

Uza ku mwanya wa gatatu ni nyiri kigo 'Meta' cyirimo imbuga nkoranyambaga karundura zirimo Facebook, Instagram, Whatsapp na Threads, uyu mugabo umaze imyaka irenga 20 atuma abantu baganira mu buryo bw' ikoranabuhanga ni Mark Zuckerberg, atunze agera kuri miliyari 202 z' Amadolari.

Abo ni bo baherwe bari mu rubuga rw'abatunze ari hejuru ya miliyari 200 z' Amadolari. Ni abaherwe batarimo umwe mu baherwe bamaze iminsi bayoboye urwo rutonde, Bill Gates. Nturirimo kandi umuherwe, Steve Ballmer. Bivuze ko abo bandi badatunze miliyari 200 z' Amadolari, batunze ari munsi yayo.

Nyuma yuko mu mpera z' umwaka wa 2022, Elon Musk aguze urubuga rwa Twitter yahinduye X, umutungo we wakomeje kwiyongera cyane. Ibyo bituma abasesenguzi mu by'ubukungu bavuga ko ashobora kuzaba umuntu wa mbere uzagira miliyari 1000 z' Amadolari.

Mark Zuckerberg na Jeff Bezos na bo ntibicaye kuko bakomeje guteza imbere inganda zabo zikora ibijyanye n'ubucuruzi bwo mu ikoranabuhanga.