Madame Louise Mushikiwabo yagaragaje agahinda yatewe n'ivangura Abafaransa bari gukorera Aya Namakula

Ibi yabitangaje nyuma y’aho Perezida w’Ubufaransa Emanuel Macron asabye uyu muhanzikazi ko yazaririmbira imbaga y’abantu bazitabira ibirori byo gutangiza imikino Olempic Paris 2024, ibyaje kubabaza Abafaransa cyane bavuga ko Aya Namakula adakwiye guhagararira Ubufaransa kandi atariho akomoka.

Ubwo Madame Louise Mushikiwabo yari ari mu kiganiro yatumiwemo kuri TV5 Monde yabajijwe icyo atekereza ku biri gukorerwa uyu muhanzikazi nk’umuyobozi wa OIF, avuga ko yatunguwe cyane no kubona umuhanzikazi ukomoka muri Africa akorerwa ivangura bigeza hariya.

Ibi yabivuze abikomoye ku magambo Aya Namakula yabwiwe n’agatsiko k’Abafaransa biyita bakavukire ku ifoto bashyize ku mbuga nkoranyambaga zabo bagira bati “oya ntabwo bishoboka iyi ni Paris ntabwo ari isoko ry’I Bamako (Mali)”

Aya magambo asa n’aho ari yo yabaye imbarutso bituma abantu cyane cyane Abirabura bahaguruka bakarwanya bivuye inyuma aba Bafaransa  bari gukorera ivangura uyu muhanzikazi ukomoka muri Africa ariko akaba akorera ibikorwa bye mu gihugu cy’Ubufaransa ahanini usanga bari kumuziza ko aririmba Igifaransa ariko akavangamo n’ururimi rw’iwabo muri Mali.

Mushikiwabo yavuze ko abantu badakwiye gutegeka umuhanzi injyana cyangwa ururimi agomba kuririmbamo.

Yagize ati “Byarantunguye cyane kubona umuhanzikazi ufite inkomoko muri Africa akorerwa biriya. Ariya magambo bamubwiye ni irondaruhu.”