Kyle Walker yagize icyo avuga ku mutoza mushya w'Abongereza, Thomas Tuchel

Thomas Tuchel wanditse amateka mu ikipe ya Chelsea yagizwe umutoza mushya w'ikipe y'igihugu y'Abongereza, bamwe bavuga ko barebye hafi byari kuba byiza iyo bashyiraho umutoza ufite inkomoko mu Bwongereza, ariko Kyle Walker yavuze ko abona abamushyizeho bararebye kure.

Thomas Tuchel watoje Chelsea agatwarana igikombe cya UEFA Champions League na Chelsea nyuma akajya muri Paris Saint  Germain, none yagizwe umutoza w'U Bwongereza asimbuye Gareth Southgate. Aba abaye umutoza gatatu w'umunyamahanga utoje iyo kipe.

Abongereza bamaze kumenya ko uwo mugabo w'Umudage yagizwe umutoza w'ikipe yabo, bamwe bahagurukiye rimwe bamaganira kure icyo kemezo, bavuga ko byari kuba byiza iyo bashyiraho umwe mu batoza b'Abongereza.

Umwongereza akaba na kapiteni w'ikipe yo mu Bwongereza, Manchester City, Kyle Walker yavuze ko Thomas Tuchel akwiriye gutoza ikipe yabo.

Yagize ati:"Ariko njye sintekereza inkomoko y'umuntu ahubwo nshingira ku bisubizo agiye kuduha. Thomas Tuchel yamaze kwemeza ko ari umutoza munini kandi utanga ibisubizo byiza, mwabonye ko yatoje abakinnyi bakuru n'amakipe y'ubukombe nka PSG na Chelsea."

"Tuchel ni umutoza mwiza kuko yabashije gutwara igikombe cya UEFA Champions League ari kumwe na Chelsea, mwibuke ko yagitwaye Manchester City, muri make ni umutoza wiyemeza ikintu akakigeraho."

Kyle Walker yakomeje agira ati:"Tuzareba, ntabwo washingira gusa ku hahise ariko ubunararibonye bufite ikintu gikomeye buvuze."

Ishyirwaho rya Tuchel ryateje ururondogo ku mbuga nkoranyambaga cyane cyane mu bihebeye ikipe y'igihugu y'U Bwongereza, ariko byabaye ibintu byoroshye kuri Kyle Walker kuko we abona ari ikemezo kiza ngo Thomas Tuchel natanga umusaruro mwiza abamwanga bazamukunda.

Kyle Walker abona Thomas Tuchel ari umutoza mwiza