Kigali : Hatangiye iburanisha ku bujurire ku ifungwa n’ifungurwa rya Hassan Bahame

Bahame yatawe muri yombi n’Urwego rw’Igihugu rw’Ubugenzacyaha (RIB) ku wa 16 Ukuboza, akurikiranyweho ibyaha byo gukoresha ububasha ahabwa n’inshingano mu nyungu ze bwite ndetse no gusambanya abagore bari mu kigo ayobora, abizeza kuborohereza gusohoka mbere y’igihe cyangwa kubafasha kubona inkunga yo gutangira imishinga mito nyuma yo kurangiza igifungo.

Ubushinjacyaha bunavuga ko yabakangishaga ko bashobora gusubizwa mu kigo nibaramuka bamwanze.

Mu kwezi gushize, Urukiko rw’Ibanze rwa Nyamata rwategetse ko arekurwa by’agateganyo, ruvuga ko nta mpamvu zikomeye zatanzwe zigaragaza ko hari ibimenyetso bihagije byatuma afungwa by’agateganyo.

Icyo cyemezo ni cyo Ubushinjacyaha bwahise bujuririra, busaba ko akurikiranwa afunzwe mu gihe ategereje kuburana mu mizi.

Mu iburanisha ryo kuri uyu wa Kane, umwunganizi wa Bahame, Me Emeline Nyembo, yasabye ko urubanza rubera mu muhezo bitewe n’uburemere bw’iki kibazo, hagamijwe kurinda abavuga ko bahohotewe.

INDI NKURU WASOMA : Amag The Black yahakanye ibyo P-Fla yamuvuzeho 

Ubushinjacyaha bwashyigikiye iki cyifuzo, maze urukiko rwemeza ko iburanisha rikomereza mu muhezo.

Mu nyandiko z’Ubushinjacyaha, harimo ubuhamya bw’abagore babiri bavuga ko bakoranye imibonano mpuzabitsina ku gahato na Bahame. 

Umwe muri bo yavuze ko yasamye inda, akaza guhabwa amafaranga yo kuyikuramo no kurekurwa atarangije igihe cyose cy’igororamuco.

Icyakora, mu cyemezo cyafashwe muri Mutarama, urukiko rwagaragaje ko hari ibitagenda mu bimenyetso byatanzwe. Rwavuze ko nubwo Ubushinjacyaha bwavuze ko RIB yari yaramenye aya makuru kuva mu 2022, nta gihamya cyatanzwe cyerekana igihe iperereza ryatangiriye.

Rwanagaragaje kandi ko ubuhamya bumwe bwari buvuguruzanya, cyane cyane ku bijyanye n’inda bivugwa ko yasamye n’uko byagenze.