Jose Chameleone na Pallaso bazongera bataramire i Kigali
Umuhanzi wo mu gihugu cya Uganda, Jose Chameleone yatangaje ko we n'umuvandimwe we, Pallaso bazaha ibyishimo abazitabira umukino uzatangirwamo igikombe ukaba uzahuza APR FC na Musanze FC ku wa 28 Gicurasi 2025.
Jose Chameleone wataramiye i Kigali ku Cyumweru tariki ya 25 Gicurasi 2025, we na Pallaso bagaragaye ku mugoroba wo ku wa Mbere tariki ya 26 Gicurasi basuye ubuyobozi bw' ikipe ya APR FC babuhamiriza ko bazataramira abazitabira umukino wa nyuma wa shampiyona ikipe ya APR FC izamurikirwamo igikombe cya shampiyona y'umwaka w’imikino 2024/25.
Ni umukino uzayihuza na Musanze FC ubere kuri Sitade Amahoro ku mugoroba wo ku wa Gatatu tariki ya 28 Gicurasi 2025.
Mu mashusho yashyizwe hanze na APR FC agaragaza ubuyobozi bw' ikipe ya APR FC bwakirira mu biro Jose Chameleone, umuhungu we n'umuvandimwe we, Pallaso.
Bagiranye ibiganiro biganisha kuzasusurutsa abazitabira umukino wa APR FC na Musanze FC. Babahamiriza ko biteguye kandi bazakorerayo igitaramo kidasanzwe.
Nyuma y'ibiganiro, Jose Chameleone agaragara ateruye igikombe cya shampiyona ubundi agatumira abantu kuzitabira uwo mukino uzishimirwamo igikombe cya shampiyona n'ibindi iyo ikipe iherutse gutwara birimo icya Super Cup, icy'Amahoro n'icyo cya shampiyona.
What's Your Reaction?
